പൂഞ്ഞാറില്‍ മത്സരിക്കാന്‍ തയാറെന്ന് പി സി ജോര്‍ജ്; ബിജെപി നേതൃത്വത്തെ അറിയിച്ചു

കോട്ടയം:  വരാനിരിക്കുന്ന നിയമസഭാ തിരഞ്ഞെടുപ്പില്‍ പൂഞ്ഞാര്‍ മണ്ഡലത്തില്‍ ബിജെപി സ്ഥാനാര്‍ത്ഥിയായി പി.സി. ജോര്‍ജ് തന്നെ ജനവിധി തേടും. മത്സരരംഗത്തുണ്ടാകാന്‍ തയ്യാറാണെന്ന കാര്യം അദ്ദേഹം ബിജെപി നേതൃത്വത്തെ ഔദ്യോഗികമായി അറിയിച്ചു. ഇതോടെ, പാലായ്ക്ക് പിന്നാലെ പൂഞ്ഞാറിലും ശക്തമായ ത്രികോണ മത്സരത്തിനുള്ള കളമൊരുങ്ങിയിരിക്കുകയാണ്.

കഴിഞ്ഞ ദിവസങ്ങളില്‍ ബിജെപി ദേശീയ നേതാക്കളടക്കം പി.സി. ജോര്‍ജുമായി ചര്‍ച്ചകള്‍ നടത്തുകയും മത്സരിക്കണമെന്ന് ആവശ്യപ്പെടുകയും ചെയ്തിരുന്നു. ഈ നിര്‍ദ്ദേശത്തിന് അദ്ദേഹം അനുകൂലമായ നിലപാട് അറിയിച്ചതോടെ, ബിജെപിയുടെ ആദ്യഘട്ട സ്ഥാനാര്‍ത്ഥി പട്ടികയില്‍ തന്നെ ജോര്‍ജ് ഇടംപിടിക്കുമെന്നാണ് സൂചന. പാലായില്‍ മകന്‍ ഷോണ്‍ ജോര്‍ജ് സ്ഥാനാര്‍ത്ഥിയാകുന്നത് മധ്യതിരുവിതാംകൂറിലെ എന്‍ഡിഎയുടെ മുന്നേറ്റത്തിന് ഊര്‍ജ്ജമാകുമെന്ന് പാര്‍ട്ടി കണക്കാക്കുന്നു.

കഴിഞ്ഞ തിരഞ്ഞെടുപ്പില്‍ പൂഞ്ഞാറില്‍ ഏകദേശം 29 ശതമാനം വോട്ട് നേടാന്‍ പി.സി. ജോര്‍ജിന് സാധിച്ചിരുന്നു. അന്ന് യുഡിഎഫ് മൂന്നാം സ്ഥാനത്തേക്ക് പിന്തള്ളപ്പെട്ട സാഹചര്യം കണക്കിലെടുത്ത്, ഇത്തവണ ബിജെപിയുടെ ഔദ്യോഗിക ചിഹ്നത്തില്‍ മത്സരിക്കുന്നത് വലിയ വിജയസാധ്യത നല്‍കുന്നുണ്ടെന്നാണ് നേതൃത്വത്തിന്റെ വിലയിരുത്തല്‍. അയല്‍മണ്ഡലങ്ങളായ പാലായിലും പൂഞ്ഞാറിലും ഒരേസമയം സ്വാധീനം ചെലുത്താനാണ് ബിജെപി നീക്കം.