തിരുവല്ല സ്പാ ബലാത്സംഗ കേസ്: ഒരാള്‍ കൂടി പിടിയില്‍

തിരുവല്ലയിലെ സ്പാ സെന്ററില്‍ ഗുണ്ടാസംഘം അതിക്രമിച്ചു കയറി ജീവനക്കാരിയെ കൂട്ടബലാത്സംഗം ചെയ്ത കേസില്‍ ഒരാള്‍ കൂടി പിടിയില്‍. നിരണം സ്വദേശിയായ വരുണ്‍ ആണ് മൂന്നാമതായി അന്വേഷണസംഘത്തിന്റെ വലയിലായത്. ഇതോടെ കേസില്‍ അറസ്റ്റിലായവരുടെ എണ്ണം മൂന്നായി. ആകെ ആറ് പ്രതികളുള്ള കേസില്‍ ഇനി മൂന്ന് പേരെ കൂടി കണ്ടെത്താനുണ്ട്. മുഖ്യപ്രതിയായ മരണ സുബിന്‍ എന്ന് വിളിക്കപ്പെടുന്ന സുബിന്‍ അലക്‌സാണ്ടര്‍, സഹായി ബെര്‍ലിന്‍ ദാസ് എന്നിവരെ നേരത്തെ തന്നെ പൊലീസ് പിടികൂടിയിരുന്നു. ഒളിവിലുള്ള ബാക്കി പ്രതികള്‍ക്കായി ഊര്‍ജിതമായ തെരച്ചില്‍ തുടരുകയാണ്.

50,000 രൂപ ഗുണ്ടാപ്പിരിവ് ആവശ്യപ്പെട്ട് സ്പായില്‍ എത്തിയ സുബിനും സംഘവും പണം നല്‍കില്ലെന്ന് അറിയിച്ചതോടെ ജീവനക്കാരിയെ ക്രൂരമായ പീഡനത്തിന് ഇരയാക്കുകയായിരുന്നു. കത്തിമുനയില്‍ നിര്‍ത്തിയായിരുന്നു പീഡനം. ഇതിന്റെ ദൃശ്യങ്ങള്‍ മൊബൈലില്‍ പകര്‍ത്തുകയും വിവരം പുറത്തുപറഞ്ഞാല്‍ കൊലപ്പെടുത്തുമെന്ന് ഭീഷണിപ്പെടുത്തുകയും ചെയ്തു. ഈ സമയത്ത് സ്പായില്‍ എത്തിയ മറ്റൊരു യുവതിയെയും ഇവര്‍ ഭീഷണിപ്പെടുത്തി പണം തട്ടിയെടുത്തിരുന്നു. പ്രതികള്‍ സ്പായില്‍ നിന്ന് ഇറങ്ങിപ്പോകുന്ന സിസിടിവി ദൃശ്യങ്ങള്‍ കേസില്‍ നിര്‍ണ്ണായക തെളിവായി മാറി.

അതേസമയം, തിരുവല്ലയിലെ സ്പാകളില്‍ നിന്ന് പൊലീസ് ഉദ്യോഗസ്ഥര്‍ മാസപ്പടി വാങ്ങുന്നുണ്ടെന്ന ആരോപണം അന്വേഷണസംഘം തള്ളി. പൊലീസിന്റെ സമയോചിതമായ ഇടപെടല്‍ മൂലമാണ് പ്രതികളെ വേഗത്തില്‍ പിടികൂടാന്‍ സാധിച്ചതെന്നാണ് ഉദ്യോഗസ്ഥരുടെ വിശദീകരണം. എന്നിരുന്നാലും, പൊലീസിനെതിരെ ഉയര്‍ന്ന ഗുരുതരമായ ആരോപണങ്ങളില്‍ വിജിലന്‍സ് അന്വേഷണം പുരോഗമിക്കുകയാണ്. സ്പായുമായി ബന്ധപ്പെട്ട എല്ലാ സാമ്പത്തിക ഇടപാടുകളും ബിസിനസ് തര്‍ക്കങ്ങളും അന്വേഷണ പരിധിയില്‍ ഉള്‍പ്പെടുത്തിയിട്ടുണ്ട്. ഒന്നാം തീയതി നടന്ന സംഭവത്തില്‍ മൂന്നാം തീയതിയാണ് പൊലീസ് കേസ് രജിസ്റ്റര്‍ ചെയ്തത്.