കോഴിക്കോട് ഫ്രഷ്‌കട്ട് സമരം: ഒരാൾ കൂടി അറസ്റ്റിൽ; ആകെ അറസ്റ്റിലായവരുടെ എണ്ണം 32 ആയി

കോഴിക്കോട്: കട്ടിപ്പാറയിലെ ഫ്രഷ്‌കട്ട് അറവ് മാലിന്യ സംസ്കരണ കേന്ദ്രവുമായി ബന്ധപ്പെട്ടുണ്ടായ സംഘർഷത്തിൽ ഒരാൾ കൂടി അറസ്റ്റിലായി. സമരത്തിനിടെ പോലീസിന് നേരെ കല്ലെറിഞ്ഞ മൂലത്തുമണ്ണിൽ ഷഫീഖ് ആണ് പിടിയിലായത്. ഇതോടെ ഈ കേസുമായി ബന്ധപ്പെട്ട് അറസ്റ്റിലായവരുടെ എണ്ണം 32 ആയി.

മാലിന്യ സംസ്കരണ കേന്ദ്രത്തിനെതിരെ നാട്ടുകാർ നടത്തിയ പ്രതിഷേധത്തെ തുടർന്ന് കഴിഞ്ഞ 21-നാണ് താമരശ്ശേരി ഫ്രഷ്‌കട്ടിൽ സംഘർഷം നടന്നത്. അതേസമയം, ഒളിവിലുള്ള സമരസമിതി ചെയർമാൻ ബാബു കുടുക്കിലിനെ പിടികൂടാൻ പോലീസിന് ഇതുവരെ കഴിഞ്ഞിട്ടില്ല. ഇയാൾക്കായി അന്വേഷണം ഊർജിതമാക്കിയിട്ടുണ്ട്. ബാബു കുടുക്കിൽ നിലവിൽ യു.ഡി.എഫ് സ്ഥാനാർത്ഥിയാണെന്നതും ഇയാൾക്കായി സമരസമിതി പ്രവർത്തകർ തന്നെയാണ് പ്രചാരണ രംഗത്തുള്ളതെന്നതും ശ്രദ്ധേയമാണ്.