രാഹുല്‍ ഒളിവില്‍ തുടര്‍ന്നേക്കും; ഫോണ്‍ ഓണാക്കി

ബലാത്സംഗക്കേസില്‍ പ്രതിയായ എംഎല്‍എ രാഹുല്‍ മാങ്കൂട്ടത്തിലിന്റെ അറസ്റ്റ് ഹൈക്കോടതി താല്‍ക്കാലികമായി തടഞ്ഞു. രാഹുല്‍ ഉന്നയിച്ച എതിര്‍വാദങ്ങള്‍ ഗൗരവയോഗ്യമാണെന്ന നിരീക്ഷണത്തിന്റെ അടിസ്ഥാനത്തിലായിരുന്നു കോടതിയുടെ നടപടി. ഹൈക്കോടതിയുടെ ഉത്തരവിന് പിന്നാലെ   രാഹുല്‍ മൊബൈല്‍ ഫോണ്‍ ഓണാക്കിയെങ്കിലും, അദ്ദേഹം ഇനിയും ഒളിവില്‍ തന്നെയായിരിക്കുമെന്ന് സൂചനകളുണ്ട്.

രണ്ടാം കേസിലും അറസ്റ്റ് തടയണമെന്നാവശ്യപ്പെട്ട് തിരുവനന്തപുരം സെഷന്‍സ് കോടതിയില്‍ അദ്ദേഹം അപേക്ഷ സമര്‍പ്പിച്ചിട്ടുണ്ട്.

ആദ്യകേസിനോടനുബന്ധിച്ചാണ് ഹൈക്കോടതി അറസ്റ്റ് തടഞ്ഞത്. രാഹുലിന്റെ ഹര്‍ജി പരിഗണിച്ച ശേഷമാണ് കോടതി നിര്‍ദേശം പുറപ്പെടുവിച്ചത്. ഡിസംബര്‍ 15ന് ഹര്‍ജി വീണ്ടും പരിഗണിക്കാന്‍ കോടതി തീരുമാനിച്ചു. കേസ് അന്വേഷിക്കുന്ന പ്രത്യേക അന്വേഷണ സംഘത്തോടും സംസ്ഥാന പൊലീസിനോടും വിശദമായ റിപ്പോര്‍ട്ട് ഹാജരാക്കാന്‍ കോടതി നിര്‍ദേശിച്ചിട്ടുണ്ട്. കേസ് ഡയറിയും കോടതിയില്‍ സമര്‍പ്പിക്കണമെന്ന് ഉത്തരവുണ്ട്.

ആദ്യകേസിലെ മുന്‍കൂര്‍ ജാമ്യാപേക്ഷ തിരുവനന്തപുരം പ്രിന്‍സിപ്പല്‍ സെഷന്‍സ് കോടതി തള്ളിയതിനെ തുടര്‍ന്നാണ് രാഹുല്‍ ഹൈക്കോടതിയെ സമീപിച്ചത്. ജസ്റ്റിസ് കെ. ബാബു അധ്യക്ഷനായ സിംഗിള്‍ ബെഞ്ചാണ് ഹര്‍ജി പരിഗണിച്ചിരിക്കുന്നത്.