ഹിജാബ് വിവാദം: സെന്റ് റീത്താസ് സ്‌കൂളില്‍ നിന്ന് രണ്ടുകുട്ടികള്‍ കൂടി പഠനം നിര്‍ത്തി

ഹിജാബ് വിവാദം തുടരുന്ന കൊച്ചി പള്ളുരുത്തിയിലെ സെന്റ് റീത്താസ് പബ്ലിക് സ്‌കൂളില്‍ നിന്ന് രണ്ടുപേര്‍ കൂടി പഠനം നിര്‍ത്തി. സ്‌കൂളിലെ രണ്ടാം ക്ലാസിലെയും മൂന്നാം ക്ലാസിലെയും വിദ്യാര്‍ത്ഥികളാണ് പഠനം നിര്‍ത്തി മറ്റൊരു സ്‌കൂളിലേക്ക് മാറുന്നത്. രക്ഷിതാവ് ട്രാന്‍സ്ഫര്‍ സര്‍ട്ടിഫിക്കറ്റിനായി അപേക്ഷ നല്‍കിയതായും കുട്ടികളെ തോപ്പുംപടിയിലെ ഔവര്‍ ലേഡീസ് കോണ്‍വെന്റ് സ്‌കൂളില്‍ ചേര്‍ക്കാനാണെന്നും അറിയിച്ചിട്ടുണ്ട്.

ഹിജാബ് ധരിച്ചതിനെ തുടര്‍ന്ന് വിവാദത്തിലായ എട്ടാം ക്ലാസ് വിദ്യാര്‍ത്ഥിനിക്ക് പിന്തുണയായി തന്നെയാണ് പഠനം നിര്‍ത്താനുള്ള ഈ തീരുമാനം. സ്‌കൂള്‍ മാനേജ്‌മെന്റും പി.ടി.എ പ്രസിഡന്റും സ്വീകരിച്ച നിലപാട് വേദനിപ്പിച്ചതായി കുട്ടികളുടെ അമ്മ ജസ്‌ന ഫേസ്ബുക്ക് പോസ്റ്റില്‍ വ്യക്തമാക്കുന്നു. ഹിജാബ് ധരിച്ചെത്തുന്ന കുട്ടിയെ കാണുന്നത് മറ്റുള്ളവരില്‍ ഭയം സൃഷ്ടിക്കുമെന്ന പ്രസ്താവന വിശ്വാസത്തെയും സംസ്‌കാരത്തെയും അപമാനിക്കുന്നതാണ്, എന്നാണ് ജസ്‌നയുടെ ഫേസ്ബുക്ക് കുറിപ്പിലെ വാക്കുകള്‍.

പള്ളുരുത്തി സെന്റ് റീത്താസ് സ്‌കൂളില്‍ തന്നെ കുട്ടികള്‍ പഠിക്കുന്നതായും, ഹിജാബ് ധരിച്ചതിന്റെ പേരില്‍ സ്‌കൂള്‍ അധികൃതരുടെ സമീപനം ഭയപ്പെടുത്തുന്നതായും ജസ്‌ന ഫേസ്ബുക്കില്‍ കുറിച്ചു. താനൊരു ഹിജാബ് ധരിക്കുന്ന സ്ത്രീയാണെന്നും അതിനാല്‍ വിഷയത്തില്‍ തനിക്ക് വ്യക്തിപരമായ വേദനയുണ്ടെന്നും അവള്‍ വ്യക്തമാക്കി.