ഓപ്പറേഷന്‍ സിന്ധു: ഇറാനില്‍ നിന്ന് ഒഴിപ്പിച്ച ആദ്യ വിദ്യാര്‍ഥി സംഘം ഡല്‍ഹിയില്‍ എത്തി

ഡല്‍ഹി:  ഓപ്പറേഷന്‍ സിന്ധു ദൗത്യത്തിന്റെ ആദ്യ ഘട്ടത്തില്‍ ഇറാനില്‍ നിന്നും 110 വിദ്യാര്‍ത്ഥികളുടെ സംഘം ഡല്‍ഹിയില്‍ എത്തി. ഇന്‍ഡിഗോയുടെ പ്രത്യേക വിമാനത്തിലാണ് വിദ്യാര്‍ഥികള്‍ ഇന്ദിരാഗാന്ധി രാജ്യാന്തര വിമാനത്താവളത്തിലെത്തിയത്. വന്നവരില്‍ 90 വിദ്യാര്‍ഥികളും ജമ്മു കശ്മീരില്‍ നിന്നുള്ളവരാണ്.

ഇറാനില്‍ നിന്ന് സുരക്ഷിതമായി അതിര്‍ത്തിയിലൂടെ അര്‍മേനിയയില്‍ എത്തിച്ച ശേഷമാണ് വിദ്യാര്‍ത്ഥികളെ ഡല്‍ഹിയിലെത്തിച്ചത്. ഡല്‍ഹിയില്‍ എത്തുന്നവരെ നാട്ടിലേക്ക് എത്തികാനും ജമ്മുകശ്മീര്‍ സ്റ്റുഡന്റ് അസോസിയേഷന്‍ ക്രമീകരണം ഒരുക്കിയിട്ടുണ്ട്. വിമാന മാര്‍ഗമോ, ട്രെയിന്‍ മുഖേനയോ ആകും സ്വദേശങ്ങളിലെത്തിക്കുക. ഇറാനില്‍ 13,000ത്തിലധികം ഇന്ത്യന്‍ വിദ്യാര്‍ഥികളുണ്ടെന്നാണ് കണക്ക്. ഇതില്‍ ഭൂരിപക്ഷവും മെഡിക്കല്‍ വിദ്യാര്‍ഥികളാണ്.

സമയബന്ധിതമായുള്ള ഒഴിപ്പിക്കല്‍ ശ്രമത്തിനു ജമ്മു കശ്മീര്‍ വിദ്യാര്‍ഥി അസോസിയേഷന്‍ പ്രധാനമന്ത്രി നരേന്ദ്ര മോദിക്കും വിദേശകാര്യ മന്ത്രി എസ്. ജയശങ്കറിനും നന്ദി പറഞ്ഞു. മറ്റു വിദ്യാര്‍ഥികളെ ഉടന്‍ നാട്ടിലേക്ക് എത്തിക്കുമെന്ന് പ്രതീക്ഷിക്കുന്നതായും വിദ്യാര്‍ഥി അസോസിയേഷന്‍ പറഞ്ഞു. സംഘര്‍ഷ സാഹചര്യം മാറി തിരികെ മടങ്ങാന്‍ കഴിയുന്ന സാഹചര്യം ഒരുങ്ങണമെന്നാണ് വിദ്യാര്‍ഥികള്‍ പറയുന്നത്.