നിവിന്‍ പോളിയും കുടുങ്ങി; പിന്നാലെ ആരൊക്കെ... വെളിപ്പെടുത്തലുകളില്‍ `ഉറക്കം` നഷ്ടപ്പെടുന്നവരുടെ എണ്ണം കൂടുന്നു

കൊച്ചി: സിനിമയിലെ വെളിപ്പെടുത്തലുകളില്‍ `ഉറക്കം` നഷ്ടപ്പെടുന്നവരുടെ എണ്ണം കൂടി വരികെയാണ്. ഏറ്റവും ഒടുവിലിതാ മലയാളികളുടെ പ്രിയ താരം നിവിന്‍ പോളിയും പീഡനാരോപണത്തില്‍ കുടുങ്ങിയിരിക്കുകയാണ്.

സിനിമയില്‍ അവസരം വാഗ്ദാനം ചെയ്ത് ദുബായില്‍ വച്ച് പീഡിപ്പിച്ചെന്നാണു നിവിന്‍ പോളിക്ക് എതിരെയുള്ള ആരോപണം. എറണാകുളം ഊന്നുകല്‍ സ്വദേശിയായ യുവതിയാണ് വെളിപ്പെടുത്തലുമായി രംഗത്തെത്തിയത്. യുവതിയുടെ പരാതിയില്‍ പോലീസ് കെസെടുത്തു.

ജാമ്യമില്ലാ വകുപ്പ് പ്രകാരമാണ് കേസെടുത്തിരിക്കുന്നത്. കേസില്‍ ആറാം പ്രതിയാണ്ണ് നിവിന്‍. നിര്‍മാതാവ് എ.കെ. സുനിലാണ് രണ്ടാം പ്രതി. കഴിഞ്ഞ നവംബറില്‍ ദുബായിലെ ഹോട്ടലില്‍ വച്ചാണു പീഡനം നടന്നതെന്നാണ് ആരോപണം.

നിവിന്‍ പോളിക്കെതിരായ അന്വേഷണം എസ്‌ഐടി സംഘം ഏറ്റെടുക്കും. ശ്രേയ എന്ന സ്ത്രീയാണ് അവസരം വാഗ്ദാനം ചെയ്ത് യുവതിയെ വിദേശത്തേക്ക് കൊണ്ടുപോയത്. ശ്രേയയാണ് ഒന്നാം പ്രതി. ഹേമ കമ്മിറ്റി റിപ്പോര്‍ട്ട് പുറത്തുവന്ന ശേഷമുള്ള വെളിപ്പെടുത്തലുകളില്‍ എറണാകുളത്ത് റജിസ്റ്റര്‍ ചെയ്ത കേസുകളുടെ എണ്ണം 11 ആയി.

അതേസമയം ആരോപണത്തില്‍ പ്രതികരണവുമായി നിവിന്‍ പോളി രംഗത്തെത്തി. ആരോപണം അടിസ്ഥാനരഹിതമാണെന്നും പെണ്‍കുട്ടിയെ കണ്ടിട്ടില്ലെന്നും നിവിന്‍ പറഞ്ഞു. ആരോപണം ഉന്നയിക്കുന്നവരുടെ ലക്ഷ്യം ബ്ലാക്ക്‌മെയിലാണോ എന്ന് സംശയയമുണ്ട്. ഇതിനെ നിയമപരമായി പോരാടും. തന്നെക്കൊണ്ടാകുന്ന രീതിയില്‍ നിരപരാധിത്വം തെളിയിക്കും. നാളെ ആര്‍ക്കെതിരെയും ഇതുപോലെ ആരോപണം വരാം. അവര്‍ക്കെല്ലാവര്‍ക്കും വേണ്ടിയാണ് ഞാനിത് സംസാരിക്കുന്നതെന്നും നിവിന്‍ പറഞ്ഞു.