സമരം പരിഹരിക്കണമെന്നല്ല. അവരുടെ ജീവിതം നേരെയാകണം; ആശാ വര്‍ക്കര്‍മാരുടെ സമരത്തില്‍ സുരേഷ് ഗോപി

ആശാ വര്‍ക്കര്‍മാരുടെ സമരത്തിനോട് പൂര്‍ണ്ണ പിന്തുണ പ്രഖ്യാപിച്ചും അവരുടെ അവകാശങ്ങള്‍ ഉറപ്പാക്കണമെന്ന് ആവശ്യപ്പെട്ടും  സുരേഷ് ഗോപി. സമരം മുന്നോട്ടു പോകട്ടെ, അവര്‍ക്ക് അവകാശമായതെല്ലാം ലഭിക്കണം. ഈ വിഷയത്തില്‍ പറയാനുള്ളത് ബിജെപി ദേശീയ അധ്യക്ഷന്‍ ജെ.പി. നദ്ദ പാര്‍ലമെന്റില്‍ നേരത്തെ വ്യക്തമാക്കിയിട്ടുണ്ട്. അതിന് മാറ്റമൊന്നുമില്ല. സമരം അവസാനിപ്പിക്കണമെന്നല്ല, അവരുടെ ജീവിതം മെച്ചപ്പെടണമെന്നതാണ് എന്റെ നിലപാട് സുരേഷ് ഗോപി പറഞ്ഞു.

ആരോഗ്യമന്ത്രിക്ക് ഈ പ്രശ്‌നം മനസ്സിലാവുന്നുണ്ടോ എന്ന മാധ്യമപ്രവര്‍ത്തകരുടെ ചോദ്യത്തിന് താന്‍ ആരെയും കുറ്റം പറയുന്നില്ല എന്ന് സുരേഷ് ഗോപി മറുപടി നല്‍കി.

ഒരു സര്‍ക്കാര്‍ തീരുമാനമെടുക്കുമ്പോള്‍ സാമ്പത്തിക പരാധീനതകളെ മനസ്സിലാക്കേണ്ടതുണ്ട്. ഞാന്‍ നേരത്തെയും പറഞ്ഞതുപോലെ, സര്‍ക്കാരിന്റെ കൈവശം പണം കായ്ക്കുന്ന മരമല്ല. അതിനാല്‍ എടുത്തു ചാടി തീരുമാനങ്ങളെടുക്കാനാകില്ല.

അതേസമയം, തന്റെ പ്രസ്താവനകള്‍ ചൂണ്ടിക്കാട്ടി മാധ്യമങ്ങള്‍ അത് വ്യാഖ്യാനിച്ച രീതിയും അദ്ദേഹം വിമര്‍ശിച്ചു. നിങ്ങള്‍ അതിനെ വളച്ചൊടിച്ചു എന്നാണ് അദ്ദേഹം പറഞ്ഞത്.