ബഹിരാകാശത്തിന് മേലെ ഉടന്‍ പറക്കില്ല; ആദ്യ സ്വകാര്യ ബഹിരാകാശ ദൗത്യം മാറ്റിവച്ചു

ന്യൂയോര്‍ക്ക്: സ്വകാര്യ കമ്പനിയായ സ്‌പേസ് എക്‌സ് നടത്താനിരുന്ന ആദ്യ സ്വകാര്യ ബഹിരാകാശ നടത്ത ദൗത്യമായ പൊളാരിസ് ഡോണ്‍ വിക്ഷേപണം മാറ്റിവച്ചു. ഹീലിയം ചോര്‍ച്ച കണ്ടെത്തിയതിനെ തുടര്‍ന്നാണ് വിക്ഷേപണം മാറ്റിവച്ചതെന്ന് സ്‌പേസ് എക്‌സ്, എക്‌സ് പ്ലാറ്റ്ഫോമിലൂടെ അറിയിച്ചു. ദൗത്യം ബുധനാഴ്ച നടക്കുമെന്നും അധികൃതര്‍ അറിയിച്ചിട്ടുണ്ട്.

ഫ്‌ളോറിഡയിലെ നാസയുടെ കെന്നഡി ബഹിരാകാശ കേന്ദ്രത്തില്‍ നിന്ന് പ്രാദേശിക സമയം ചൊവാഴ്ച പുലര്‍ച്ചെയോടെയായിരുന്നു വിക്ഷേപണം നടത്താന്‍ സ്‌പേസ് എക്‌സ് തീരുമാനിച്ചിരുന്നത്. സാങ്കേതിക വിദഗ്ധര്‍ പ്രശ്‌നം പരിഹരിക്കാനുള്ള നടപടികള്‍ സ്വീകരിച്ചിട്ടുണ്ടെന്നും സ്‌പേസ് എക്‌സ് അധികൃതര്‍  വ്യക്തമാക്കി.

അഞ്ച് ദിന ദൗത്യത്തിനായി മലയാളിയും സ്‌പേസ് എക്‌സിലെ മെഡിക്കല്‍ വിദഗ്ധനുമായ ഡോ.അനില്‍ മേനോന്റെ ഭാര്യ അന്ന മേനോന്‍ അടക്കം 4 പേരെയാണ് നിശ്ചയിരുന്നത്. സ്‌പേസ് എക്‌സിലെ എഞ്ചിനീയറായ അന്നയ്ക്ക് പുറമെ ശതകോടീശ്വരന്‍ ജാറഡ് ഐസക്മാന്‍, യുഎസ് എയര്‍ഫോഴ്‌സ് മുന്‍ പൈലറ്റായ സ്‌കോട്ട് പൊറ്റീറ്റ്, എഞ്ചിനീയര്‍ സാറാ ഗില്ലിസ് എന്നിവരെയാണ് ആദ്യ സ്വകാര്യ ബഹിരാകാശ നടത്ത ദൗത്യത്തിനായി തിരഞ്ഞെടുത്തിരുന്നത്.