അമ്മയില്‍ കൂട്ടരാജി: പ്രസിഡന്റ് മോഹന്‍ലാല്‍ ഉള്‍പ്പടെ എല്ലാവരും രാജിവച്ചു; താരസംഘടനയില്‍ പൊട്ടിത്തെറി

കൊച്ചി: ഹേമ കമ്മിറ്റി റിപ്പോര്‍ട്ടിന്റെ അടിസ്ഥാനത്തില്‍ പുറത്തുവന്ന വെളിപ്പെടുത്തലുകളെ തുടര്‍ന്ന് താരസംഘടന അമ്മയില്‍ കൂട്ടരാജി. പ്രസിഡന്റ് മോഹന്‍ലാല്‍ ഉള്‍പ്പെടെ എല്ലാവരും രാജിവെച്ചു. ഇതോടെ നിലവിലെ അമ്മ ഭരണസമിതി പിരിച്ചുവിട്ടു. 

ഹേമ കമ്മിറ്റി റിപ്പോര്‍ട്ടറിനെ തുടര്‍ന്ന് സിനിമ രംഗത്തെ അതിക്രമങ്ങളില്‍ പരാതിയുമായി കൂടുതല്‍പ്പേര്‍ രംഗത്ത് എത്തിയതിന് പിന്നാലെ അമ്മയില്‍ കടുത്ത ഭിന്നതയുണ്ടായിരുന്നു. അമ്മയ്ക്ക് തെറ്റുപറ്റിയെന്ന് നടന്‍ പൃഥ്വിരാജ് അടക്കം വിമര്‍ശനം ഉന്നയിച്ചതിന് പിന്നാലെയാണ് നില്‍ക്കക്കള്ളിയിലാതെ കൂട്ടരാജിയിലേക്ക് എത്തിയത്. 

അമ്മയിലെ ഭാരവാഹികളില്‍ ചിലര്‍ നേരിടേണ്ടിവവന്ന ലൈംഗികാരോപണങ്ങളുടെ പശ്ചാത്തലത്തില്‍ ധാര്‍മിക ഉത്തരവാദിത്തം മുന്‍നിര്‍ത്തിയാണ് രാജി എന്നായിരുന്നു മോഹന്‍ലാല്‍ തന്റെ രാജിക്കത്തില്‍ പറഞ്ഞത്. 

രാജിക്കത്തിന്റെ പൂര്‍ണരൂപം ഇങ്ങനെ: ഹേമാ കമ്മിറ്റി റിപ്പോര്‍ട്ട് പുറത്തു വന്നതിനെ തുടര്‍ന്ന് സാമൂഹ്യദൃശ്യഅച്ചടി മാധ്യമങ്ങളില്‍ അമ്മസംഘടനയിലെ ഭരണ സിമിതിയിലെ ചില ഭാരവാഹികള്‍ നേരിടേണ്ടി വന്ന ലൈംഗികാരോപണങ്ങളുടെ പശ്ചാത്തലത്തില്‍, അമ്മയുടെ നിലവിലുള്ള ഭരണ സമിതി അതിന്റെ ധാര്‍മ്മികമായ ഉത്തരവാദിത്വം മുന്‍നിര്‍ത്തി രാജി വെയ്ക്കുന്നു. 

രണ്ട് മാസത്തിനുള്ളില്‍ പൊതുയോഗം കൂടി പുതിയ ഭരണ സമിതിയെ തെരെഞ്ഞെടുക്കും. അമ്മ ഒന്നാം തീയതി നല്കുന്ന കൈനീട്ടവും ആരോഗ്യ ചികിത്സയ്ക്ക് നല്‍കിപ്പോരുന്ന സഹായവും അമ്മയുടെ സമാദരണീയരായ അംഗങ്ങള്‍ക്ക് തടസം കൂടാതെ ലഭ്യമാക്കാനും പൊതുയോഗം വരെ ഓഫിസ് പ്രവര്‍ത്തനങ്ങള്‍ ഏകോപിപ്പിക്കാനും നിലവിലുള്ള ഭരണ സമിതി താത്ക്കാലിക സംവിധാനമായി തുടരും.

അമ്മയെ നവീകരിക്കാനും ശക്തിപ്പെടുത്തുവാനും കെല്പുള്ള പുതിയൊരു നേതൃത്വം അമ്മയ്ക്കുണ്ടാവുമെന്ന ശുഭപ്രതീക്ഷയിലാണ് ഞങ്ങള്‍. എല്ലാവര്‍ക്കും നന്ദി, വിമര്‍ശിച്ചതിനും തിരുത്തിയതിനും. എന്നായിരുന്നു രാജിക്കത്തില്‍ പറയുന്നത്. 

ആരോപണം ഉയര്‍ന്ന ഘട്ടത്തില്‍ ജനറല്‍ സെക്രട്ടറി സിദ്ദിഖ് കഴിഞ്ഞ ദിവസം രാജിവച്ചിരുന്നു. ജോയിന്റ് സെക്രട്ടറിയായിരുന്ന ബാബുരാജ് ഈ സ്ഥാനത്തേക്ക് എത്തുമെന്ന് ആഭ്യൂഗങ്ങള്‍ പരക്കുന്നതിനിടെ ബാബുരാജിനെതിരെയും ആരോപണം ഉണ്ടായി. പിന്നീട് കടുത്ത പ്രതിസന്ധിയിലായി അമ്മയും നേതൃത്വവും. 

ഇന്ന് നടത്താനിരുന്ന അമ്മയുടെ എക്‌സിക്യൂട്ടീവ് യോഗം മാറ്റിവച്ചതായി കഴിഞ്ഞ ദിവസം വാര്‍ത്ത വന്നിരുന്നു. നടനും അമ്മ പ്രസിഡന്റുമായ മോഹന്‍ലാലിന് യോഗത്തില്‍ നേരിട്ട് പങ്കെടുക്കാന്‍ അസൗകര്യമുള്ളതിനാലാണ് യോഗം മാറ്റിവച്ചിരിക്കുന്നത് എന്നാണ് ഔദ്യോഗിക വിവരം വന്നത്. 

മോഹന്‍ലാല്‍ നിലവില്‍ ചെന്നൈയിലാണെന്നാണ് വിവരം. മോഹന്‍ലാലിന് നേരിട്ട് തന്നെ യോഗത്തില്‍ പങ്കെടുക്കണമെന്ന് പറഞ്ഞതുകൊണ്ടുമാണ് യോഗം മാറ്റിവച്ചത്. പുതിയ തീയതി ഉടന്‍ അറിയിക്കാമെന്ന് അമ്മ ഭാരവാഹികള്‍ അറിയിച്ചിരുന്നു. അതിനിടയിലാണ് കൂട്ടരാജിയുണ്ടായത്.