അമേരിക്കയില്‍ ചിത്രം തെളിഞ്ഞു: ട്രംപിനെ വെല്ലുവിളിച്ച് കമല; അമേരിക്കയില്‍ ചരിത്രം മാറുമോ?

ചികാഗോ: അമേരിക്കയുടെ ആദ്യ വനിതാ പ്രസിഡന്റാകാനുള്ള അവസരം ഏറ്റെടുത്ത് ഇന്ത്യന്‍ വംശജ കൂടിയായ കമല ഹാരിസ്. യു.എസ് പ്രസിഡന്റ് തെരഞ്ഞെടുപ്പില്‍ ഡെമോക്രാറ്റിക് പാര്‍ട്ടിയുടെ നാമനിര്‍ദേശം കമല ഹാരിസ് സ്വീകരിച്ചു. വര്‍ഗ-ലിംഗ- കക്ഷിഭേദമന്യേ എല്ലാ അമേരിക്കക്കാര്‍ക്കുംവേണ്ടി പ്രസിഡന്റ് ആവാനുള്ള നാമനിര്‍ദേശം സ്വീകരിക്കുകയാണെന്ന് നാലു ദിവസമായി ചികാഗോയില്‍ നടന്ന ഡെമോക്രാറ്റിക് നാഷനല്‍ കണ്‍വെന്‍ഷനില്‍ കമല ഹാരിസ് പറഞ്ഞു.

45 മിനിറ്റ് നീണ്ട പ്രസംഗത്തില്‍ എതിരാളിയായ റിപബ്ലിക്കന്‍ പാര്‍ട്ടി സ്ഥാനാര്‍ഥി ഡോണള്‍ഡ് ട്രംപിനെ അവര്‍ കടന്നാക്രമിച്ചു. ഒട്ടും ഗൗരവമില്ലാത്ത ഡോണള്‍ഡ് ട്രംപ് വീണ്ടും പ്രസിഡന്റാകുന്നത് ഗുരുതര പ്രത്യാഘാതങ്ങളുണ്ടാക്കുമെന്ന് കമല പറഞ്ഞു. ട്രംപ് ജനവിധി അട്ടിമറിക്കാന്‍ ശ്രമിച്ചു. പരാജയപ്പെട്ടപ്പോള്‍ പാര്‍ലമെന്റിലേക്ക് ആള്‍ക്കൂട്ടത്തെ അയച്ചു. അവര്‍ നിയമപാലകരെ ആക്രമിച്ചു. ആള്‍ക്കൂട്ടത്തെ തിരികെവിളിക്കാനും പ്രശ്നം പരിഹരിക്കാനും സ്വന്തം പാര്‍ട്ടിക്കാര്‍ അപേക്ഷിച്ചപ്പോള്‍ അദ്ദേഹം നേരെ വിപരീതമാണ് ചെയ്തത്. എരിതീയില്‍ എണ്ണയൊഴിച്ചുവെന്നും കമല ആരോപിച്ചു.

ഗസയിലെ യുദ്ധവുമായി ബന്ധപ്പെട്ട് ഇസ്രായേലിന്റെ സ്വയം പ്രതിരോധിക്കാനുള്ള അവകാശത്തിനുവേണ്ടി താന്‍ എപ്പോഴും നിലകൊള്ളും. സ്വയം പ്രതിരോധിക്കാനുള്ള കഴിവ് ഇസ്രായേലിനുണ്ടെന്ന് എപ്പോഴും ഉറപ്പാക്കും. കാരണം ഒക്ടോബര്‍ ഏഴിന് ഹമാസ് എന്ന ഭീകരസംഘടന നടത്തിയ ആക്രമണം ഇനിയൊരിക്കലും ഇസ്രായേല്‍ ജനത അഭിമുഖീകരിക്കരുത്.

അതേസമയം ഗസയില്‍ കഴിഞ്ഞ 10 മാസമായി വിനാശകരമായ കാര്യങ്ങളാണ് സംഭവിക്കുന്നത്. നിരവധി നിരപരാധികളുടെ ജീവന്‍ നഷ്ടപ്പെട്ടു. പട്ടിണി കിടക്കുന്ന മനുഷ്യര്‍ സുരക്ഷ തേടി വീണ്ടും വീണ്ടും പലായനം ചെയ്യുന്നു. അവരുടെ കഷ്ടപ്പാടുകര്‍ ഹൃദയഭേദകമാണെന്നും അവര്‍ പറഞ്ഞു.

ജീവിത പങ്കാളി ഡഗ്ലസ് എമോഫിനും യു.എസ് പ്രസിഡന്റ് ജോ ബൈഡനും നന്ദി പറഞ്ഞുകൊണ്ടായിരുന്നു കമലയുടെ പ്രസംഗം തുടങ്ങിയത്. മാതാവ് ശ്യാമള ഗോപാലന്‍ ഇന്ത്യയില്‍നിന്ന് അമേരിക്കയിലേക്ക് കുടിയേറിയതു മുതലുള്ള തന്റെ ജീവിതകഥയും കമല കണ്‍വെന്‍ഷനില്‍ പങ്കുവെച്ചു. നീതി ഉറപ്പാക്കാന്‍ എന്തെങ്കിലും ചെയ്യുകയാണ് വേണ്ടതെന്നാണ് അമ്മ പഠിപ്പിച്ചതെന്നും അവര്‍ കൂട്ടിച്ചേര്‍ത്തു.   ബൈഡന്‍ സര്‍ക്കാരില്‍ വൈസ് പ്രസിഡന്റായിരുന്നു കമല.