പുഷ്പ 2 വിവാദം, അയവ് വരുത്തി കോണ്‍ഗ്രസ്: അല്ലു അര്‍ജുനും സര്‍ക്കാരും തമ്മിലുള്ള തര്‍ക്കം അവസാനിക്കുന്നു; സിനിമകൊണ്ട് രാഷ്ട്രീയം കളിക്കരുതെന്ന് അനുരാഗ് താക്കൂറിന്റെ മുന്നറിയിപ്പ്

ഹൈദരാബാദ്: പുഷ്പ 2 പ്രിവ്യൂ ഷോയുമായി ബന്ധപ്പെട്ട സംഭവ വികാസങ്ങളെ തുടര്‍ന്നുണ്ടായ വിവാദങ്ങളില്‍ നിന്ന് കോണ്‍ഗ്രസും സര്‍ക്കാരും പിന്നോട്ട്. അല്ലു അര്‍ജുനുമായി ബന്ധപ്പെട്ട വിവാദങ്ങളോട് പ്രതികരിക്കേണ്ടതില്ലെന്ന് കോണ്‍ഗ്രസ് നേതാക്കള്‍ക്ക് തെലുങ്കാന പി.സി.സി നിര്‍ദേശം നല്‍കി. സിനിമാ വ്യവസായവും സംസ്ഥാന സര്‍ക്കാരും തമ്മിലുള്ള അനാവശ്യസംഘര്‍ഷം ഒഴിവാക്കുന്നതിന്റെ ഭാഗമായാണ് നീക്കം. സിനിമകൊണ്ട് രാഷ്ട്രീയം കളിക്കരുതെന്ന മുന്നറിയിപ്പുമായി അല്ലു അര്‍ജുനെ പിന്തുണയ്ച്ച് ബി.ജെ.പി എംപി അനുരാഗ് താക്കൂറും രംഗത്തെത്തി.

പുഷ്പ 2 സിനിമ പ്രീമിയര്‍ ഷോയ്ക്കിടെ തിയേറ്ററിലെ തിക്കിലും തിരക്കിലും പെട്ട് യുവതി മരിച്ച സംഭവത്തെ തുടര്‍ന്നാണ് അലു അര്‍ജുനെതിരെ സര്‍ക്കാരും പോലീസും പ്രതികാര നടപടികളുമായി രംഗത്തെത്തിയത്. അല്ലു അര്‍ജുനെ പൊതുമധ്യത്തില്‍ അവഹേളിക്കുന്ന നിലയില്‍ കോണ്‍ഗ്രസ് നേതാക്കള്‍ പ്രവസ്താവനകള്‍ നടത്തിയിരുന്നു. വിഷയം കൈവിട്ടുപോയതോടെയാണ് വിവാദ പരാമര്‍ശങ്ങള്‍ ഒഴിവാക്കാന്‍ കോണ്‍ഗ്രസ് സംസ്ഥാന നേതൃത്വം നിര്‍ദേശവുമായെത്തിയത്.

കേസ് കോടതിയില്‍ ആണെന്നും ഇത് സംബന്ധിച്ച് കോണ്‍ഗ്രസ് നേതാക്കള്‍ പൊതുപരിപാടികളിലോ മാധ്യമങ്ങളിലോ പ്രതികരിക്കരുതെന്നുമാണ് പാര്‍ട്ടിക്കുള്ളില്‍ നല്‍കിയ നിര്‍ദേശം. തെലുങ്കു സിനിമ വ്യവസായം, പുഷ്പ 2, അല്ലു അര്‍ജുന്‍, മറ്റു താരങ്ങള്‍ എന്നിവരെക്കുറിച്ച് ആരോപണങ്ങളോ വിമര്‍ശനമോ വിവാദ പരാമര്‍ശങ്ങളോ നടക്കരുതെന്നും കോണ്‍ഗ്രസ് തെലങ്കാന സംസ്ഥാന നേതൃത്വം നിര്‍ദേശം നല്‍കി. പാര്‍ട്ടി നേതൃത്വത്തിന്റെ അനുമതിയില്ലാതെ നേതാക്കള്‍ വിഷയവുമായി ബന്ധപ്പെട്ട ചാനല്‍ ചര്‍ച്ചകളില്‍ പങ്കെടുക്കരുതെന്നും നിര്‍ദേശിച്ചു.

അതേസമയം നടന്‍ അല്ലുഅര്‍ജുന് പിന്തുണയുമായി ബി.ജെ.പി എം.പിയും മുന്‍ കേന്ദ്രമന്ത്രിയുമായ അനുരാഗ് താക്കൂര്‍ രംഗത്തെത്തി. തെലുങ്ക് സിനിമ വ്യവസായത്തെ ഇല്ലാതാക്കാനാണ് ചിലരുടെ ശ്രമമെന്ന് അനുരാഗ് താക്കൂര്‍ വിമര്‍ശിച്ചു. ഇന്ത്യന്‍ സിനിമയ്ക്ക് തെലുങ്ക് സിനിമ വ്യവസായം മികച്ച സംഭാവനകള്‍ ചെയ്തിട്ടുള്ളത്. പുഷ്പ സിനിമയിലൂടെ അല്ലു ദേശീയ അവാര്‍ഡ് നേടി. ലോകസിനിമയും രാജ്യവും അംഗീകരിച്ച നടനാണ് ചിരഞ്ജീവി. ആര്‍.ആര്‍.ആര്‍, പുഷ്പ, ബാഹുബലി, കെ.ജി.എഫ് ഇവയെല്ലാം ഇന്ത്യന്‍ സിനിമയുടെ പേരിന് തിളക്കം കൂട്ടിയവയാണ്. വിവാദങ്ങള്‍ സൃഷ്ടിക്കുന്നതിനു പകരം കാര്യങ്ങള്‍ സംസാരിച്ചു തീര്‍ക്കണം, സിനിമകൊണ്ട് രാഷ്ട്രീയം കളിക്കരുതെന്നും അനുരാഗ് താക്കൂര്‍ പറഞ്ഞു.

മുഖ്യമന്ത്രി രേവന്ത് റെഡ്ഡിയുടെ അധ്യക്ഷതയില്‍ സിനിമാ മേഖലയിലെ പ്രതിനിധികളുമായി ഇന്ന് യോഗം വിളിച്ചിട്ടുണ്ട്. തെലങ്കാന പി.സി.സി അധ്യക്ഷന്‍ മഹേഷ് ഗൗഡ്, ഉപ മുഖ്യമന്ത്രി ഭാട്ടി വിക്രമര്‍ക്ക, മന്ത്രിമാരായ ഉത്തം കുമാര്‍ റെഡ്ഡി, പൊന്‍ഗുലേട്ടി ശ്രീനിവാസ് റെഡ്ഡി, ദാമോദര്‍ രാജനരംസിംഹ, കോമട്ടിറെഡ്ഡി വെങ്കട്ട് റെഡ്ഡി, പൊന്നം പ്രഭാകര്‍ എന്നിവരും യോഗത്തിനെത്തുമെന്നാണ് വിവരം.

പ്രീമിയര്‍ ഷോയ്ക്കിടെ യുവതി മരിച്ച സംഭവത്തില്‍ നടന്‍ അല്ലുവിനെ തെലങ്കാന പോലീസ് അറസ്റ്റ് ചെയ്ത് ജാമ്യത്തില്‍ വിടുകയായിരുന്നു. കഴിഞ്ഞ ദിവസം അല്ലുവിന്റെ ബൗണ്‍സര്‍ ആന്റണിയെ പോലീസ് അറസ്റ്റ് ചെയ്തിരുന്നു. ബൗണ്‍സര്‍മാര്‍ ആരാധകരെ തള്ളുകയും മര്‍ദ്ദിക്കുകയും ചെയ്യുന്ന ദൃശ്യങ്ങള്‍ പുറത്ത് വന്നിരുന്നു.