അല്ലു അർജുന്റെ അറസ്റ്റിനു പിന്നിൽ രാഷ്ട്രീയ പകപോക്കലോ?: യുവതി മരിച്ച സംഭവത്തിൽ കസ്‌റ്റഡിയിലെടുത്ത താരത്തെ കൊണ്ടുപോയത് പോലീസ് വാഹനത്തിൽ

ഹൈദരാബാദ്: പുഷ്‌പ 2 പ്രീമിയറിനിടെ ഹൈദരാബാദിലെ സന്ധ്യ തീയേറ്ററിൽ തിക്കിലും തിരക്കിലും പെട്ട് യുവതി മരിച്ച സംഭവത്തിൽ നടൻ അല്ലു അർജുനെ പോലീസ് അറസ്‌റ്റ്‌ ചെയ്‌തു. ചിക്കാടപ്പള്ളി പോലീസാണ് അല്ലുവിനെ ജൂബിലി ഹിൽസിലെ വസതിയിൽ നിന്നും കസ്‌റ്റഡിയിൽ എടുത്തത്. തുടർന്ന് പോലീസ് വാഹനത്തിൽ തന്നെ താരത്തെ ചിക്കാടപ്പള്ളി പോലീസ് സ്‌റ്റേഷനിലേക്ക് കൊണ്ടുപോയി. 

സന്ധ്യ തിയേറ്ററിൽ പുഷ്‌പ 2 പ്രീമിയറിനിടെ അനുഭവപ്പെട്ട തിക്കിലും തിരക്കിലുംപെട്ട് യുവതി മരണപ്പെടുകയും മകന് ഗുരുതരമായി പരിക്കേൽക്കുകയും ചെയ്‌തിരുന്നു. തിയേറ്ററിലേക്ക് അല്ലു അർജുൻ വന്നപ്പോഴുണ്ടായ തിരക്കാണ് അപകടത്തിൽ കലാശിച്ചത്. 

തുടർന്ന് യുവതിയുടെ ഭർത്താവ് നൽകിയ പരാതിയിൽ സന്ധ്യ തിയേറ്റർ മാനേജ്‌മെന്റ്, അല്ലു അർജുൻ, താരത്തിന്റെ സുരക്ഷാ സംഘം എന്നിവർക്കെതിരെ പോലീസ് കേസെടുത്തിരുന്നു. ഇത് രാഷ്ട്രീയ പകപോക്കലിന്റെ ഭാഗമായാണെന്നും ആക്ഷേപം ഉണ്ട്. 

മുൻകൂട്ടി അറിയിക്കാതെ അല്ലു അർജുൻ എത്തിയതാണ് അപ്രതീക്ഷിതമായി തിക്കും തിരക്കും ഉണ്ടാകാൻ ഇടായായതെന്നാണ് പോലീസ് പറഞ്ഞത്. അദ്ദേഹത്തിന്റെ ഒപ്പമുണ്ടായിരുന്ന സുരക്ഷാ ജീവനക്കാർ തിരക്ക് നിയന്ത്രിക്കുന്നതിന് പകരം ആളുകളെ തള്ളിമാറ്റുകയാണ് ചെയ്‌തത്‌. തുടർന്ന് തിക്കും തിരക്കും ഉണ്ടായി. 

കഴിഞ്ഞ ദിവസം തനിക്കെതിരെയാ കേസ് റദ്ദാക്കണം എന്ന ആവശ്യവുമായി അല്ലു അർജുൻ ഹൈക്കോടതിയെ സമീപിച്ചിരുന്നു. തിയേറ്റർ ഉടമകളെയും, പോലീസിനെയും താൻ സന്ധ്യ തിയേറ്ററിലേക്ക് വരുന്ന കാര്യം നേരത്തെ വിളിച്ച് അറിയിച്ചിരുന്നുവെന്നാണ് അല്ലു ഹർജിയിൽ പറഞ്ഞത്. തനിക്കെതിരായ ആരോപണങ്ങൾ അടിസ്ഥാനരഹിതം ആണെന്നും നടൻ പറഞ്ഞിരുന്നു.

നേരത്തെ യുവതിയുടെ മരണത്തിലും മകന്റെ പരിക്കിലും ദുഃഖം രേഖപ്പെടുത്തി അല്ലു അർജുൻ രംഗത്ത് വന്നിരുന്നു. അപകടത്തിൽ മരണപ്പെട്ട രേവതിയുടെ കുടുംബത്തിന് 25 ലക്ഷം രൂപയുടെ ധനസഹായം നൽകുമെന്നും അല്ലു അറിയിച്ചിരുന്നു. മകന്റെ ചികിത്സയ്ക്ക് ആവശ്യമായ പണം നൽകുമെന്നും പറഞ്ഞ അല്ലു അർജുൻ കുടുംബത്തിന്റെ വേദനയിൽ താനും പങ്കുചേരുകയാണെന്ന് വീഡിയോ സന്ദേശത്തിലൂടെ അറിയിച്ചിരുന്നു. ഇതിനിടെയാണ് അറസ്‌റ്റുണ്ടായത്. 

അതേസമയം അവസരം കാത്തിരുന്ന സർക്കാർ പ്രതികാരം ചെയ്യുകയാണെന്ന് വ്യാഖ്യാനങ്ങളും അറസ്റ്റിനു പിന്നാലെ ഉയർന്നു. കഴിഞ്ഞ തിരഞ്ഞെടുപ്പ് സമയത്ത് കോൺഗ്രസിനെതിരെ അല്ലു അർജുൻ പ്രസ്താവന നടത്തിയിരുന്നു. ഇതോടെ അല്ലു അർജുൻ കോൺഗ്രസ്‌ നേതാക്കൾക്ക് അപ്രിയനായി. അല്ലു അർജുനെതിരെ ഒരു അവസരം കാത്തിരിക്കുന്നതിനിടെയാണ് പുഷ്പ 2 വിവാദം വീണു കിട്ടിയത്.