പാലക്കാട് ബി.ജെ.പിയുടെ തോല്‍വിക്ക് കാരണം പൊളിറ്റക്കല്‍ ഇസ്‌ലാം; തോല്‍വിയുടെ പേരില്‍ സുരേന്ദ്രന്‍ മാറേണ്ട സാഹചര്യമില്ലെന്നും പി.സി. ജോര്‍ജ്

കോട്ടയം: പാലക്കാട് നിയമസഭ ഉപതെരഞ്ഞെടുപ്പിലെ ബി.ജെ.പിയുടെ തോല്‍വിക്ക് കാരണം പൊളിറ്റക്കല്‍ ഇസ്‌ലാമാണെന്ന വിമര്‍ശനവുമായി പി.സി. ജോര്‍ജ്. സ്ഥാനാര്‍ഥി സംബന്ധിച്ച് നഗരസഭയില്‍ അതൃപ്തിയുണ്ടായിരുന്നു. ഇത് തെരഞ്ഞെടുപ്പില്‍ പ്രതിഫലിച്ചു. തോല്‍വിയുടെ പേരില്‍ സുരേന്ദ്രന്‍ മാറേണ്ട സാഹചര്യമില്ലെന്ന് അദ്ദേഹം പറഞ്ഞു.

പാലക്കാട് മൂന്ന് പേര്‍ സ്ഥാനാര്‍ഥികളാകാന്‍ തയാറായിരുന്നു. മൂന്ന് പേരുടെ പട്ടികയാണ് കേന്ദ്രനേതൃത്വത്തിന്റെ മുന്നിലെത്തിയതെന്നും അതില്‍ നിന്നും ഒരു പേര്‍ തെരഞ്ഞെടുക്കുകയായിരുന്നുവെന്നും അദ്ദേഹം പറഞ്ഞു. തോല്‍വിയുടെ പേരില്‍ സുരേന്ദ്രന്‍ മാറേണ്ട സാഹചര്യമില്ല. തൃശൂര്‍ ജയിച്ചപ്പോള്‍ സുരേന്ദ്രന് എന്തെങ്കിലും പ്രൊമോഷന്‍ നല്‍കിയിരുന്നോവെന്നും അദ്ദേഹം ചോദിച്ചു.

പാലക്കാട് നിയമസഭ ഉപതെരഞ്ഞെടുപ്പില്‍ കനത്ത തോല്‍വിയാണ് ബി.ജെ.പി വഴങ്ങിയത്. പാര്‍ട്ടിക്കായി മത്സരിച്ച സി.കൃഷ്ണകുമാറിന് രണ്ടാം സ്ഥാനത്ത് എത്താന്‍ സാധിച്ചുവെങ്കിലും ബി.ജെ.പിക്ക് 10000ത്തോളം വോട്ട് കുറഞ്ഞു. നഗരസഭയില്‍ ഉള്‍പ്പടെ ബി.ജെ.പിക്ക് വലിയ തിരിച്ചടിയാണുണ്ടായത്. ഇതേ തുടര്‍ന്നാണ് സുരേന്ദ്രനെതിരെ പാര്‍ട്ടിക്കുള്ളില്‍ തന്നെ പടയൊരുക്കം തുടങ്ങിയത്.