സി.പി.എം ജമാഅത്തെ ഇസ്ലാമിയുടെ വോട്ടുകള്‍ വാങ്ങിയിട്ടുണ്ട്: തിരഞ്ഞെടുപ്പ് ധാരണയില്ല, സ്വതന്ത്ര പിന്തുണ മാത്രമെന്ന് പിണറായി വിജയന്‍

മലപ്പുറം: കഴിഞ്ഞ ലോകസഭാ തിരഞ്ഞെടുപ്പില്‍ സി.പി.എം മൂന്നു സീറ്റുകള്‍ നേടിയത് ജമാഅത്തെ ഇസ്ലാമിയുടെ വോട്ടുകള്‍ വാങ്ങിയാണെന്ന് ജമാഅത്തെ ഇസ്ലാമി കേരള അമീര്‍ പി.മുജീബ് റഹ്മാന്‍ പറഞ്ഞു. തമിഴ്‌നാട്ടില്‍ രണ്ടിടത്തും രാജസ്ഥാനില്‍ ഒരു സീറ്റിലും ആണ് സി.പി.എം ജയിച്ചത്.കഴിഞ്ഞ മൂന്ന് പതിറ്റാണ്ട് കാലം ജമാഅത്തെ ഇസ്ലാമിയുമായി സംസാരിക്കുകയും പിന്തുണ വാങ്ങുകയും സി.പി.എം ചെയ്തിട്ടുണ്ടെന്നും മുജീബ് റഹ്മാന്‍ പറഞ്ഞു. എന്നാല്‍ ജമാ അത്തെ ഇസ്ലാമിയുമായി തിരഞ്ഞെടുപ്പ് ധാരണ ഉണ്ടാക്കിയിട്ടില്ലെന്നും സ്വതന്ത്ര പിന്തുണ പ്രഖ്യാപിക്കുകയാണ് അവര്‍ ചെയ്തിരുന്നതെന്നു മുഖ്യമന്ത്രി പിണറായി വിജയന്‍ പറഞ്ഞു.

ജമാ അത്തെ ഇസ്ലാമിയുമായി എല്‍.ഡി.എഫ് ഒരു ഘട്ടത്തിലും തിരഞ്ഞെടുപ്പ് ധാരണ ഉണ്ടാക്കിയിട്ടില്ല. കേരളത്തിലെ സര്‍ക്കാരിനെതിരെ രാഷ്ട്രീയ വിജയം നേടാന്‍ ചേലക്കര ജയിക്കണം എന്ന് യു.ഡി.എഫ് പ്രഖ്യാപിച്ചു. അതിന് എല്ലാ സന്നാഹവും ഒരുക്കി. എന്നിട്ട് ചേലക്കരയില്‍ ഉണ്ടായത് ആരുടെ വിജയമാണ്. ജനങ്ങള്‍ സര്‍ക്കാരിനൊപ്പമാണെന്നും മുഖ്യമന്ത്രി പറഞ്ഞു.

പാലക്കാട് യു.ഡി.എഫ് നേടിയ വിജയത്തെ അംഗീകരിക്കുന്നുവെന്നും എന്നാല്‍ ആ വിജയത്തിന്റെ വഴി മനസിലാക്കേണ്ടതുണ്ടെന്നും സിപിഐഎം സംസ്ഥാന സെക്രട്ടറി എം വി ഗോവിന്ദന്‍ പറഞ്ഞിരുന്നു. പാലക്കാട്ടെ വിജയത്തിന് വര്‍ഗീയ ശക്തികളുടെ വോട്ട് വാങ്ങിയിട്ടില്ല എന്ന് രാഹുല്‍ മാങ്കുട്ടത്തില്‍ പറയുന്നുണ്ട്. വി.കെ. ശ്രീകണ്ഠന്‍ ഇന്ന് പറഞ്ഞത് എസ്.ഡി.പി.ഐ, ജമാഅത്തെ ഇസ്ലാമി എന്നിവരുടെ വോട്ട് വാങ്ങി എന്നാണ്. ആര്‍.എസ്.എസിന്റെ മറുവശമാണ് ജമാഅത്തെ ഇസ്ലാമിയെന്നും എം.വി. ഗേവിന്ദന്‍ പറഞ്ഞു.