അന്‍സിബ ഹസന്റെ പരാതിയില്‍ ടിനി ടോമിനെതിരെ കേസെടുക്കും

നടി അന്‍സിബ ഹസന്‍ നല്‍കിയ പരാതിയില്‍ നടന്‍ ടിനി ടോമിനെതിരെ കേസ് രജിസ്റ്റര്‍ ചെയ്യാന്‍ കോടതി നിര്‍ദേശിച്ചു. എറണാകുളം ഫസ്റ്റ് ക്ലാസ് ജുഡീഷ്യല്‍ മജിസ്‌ട്രേറ്റ് കോടതിയുടെ ഉത്തരവിന്റെ അടിസ്ഥാനത്തില്‍ പൊലീസ് ഉടന്‍ കേസ് എടുക്കുമെന്ന് കൊച്ചി സിറ്റി പൊലീസ് കമ്മിഷണര്‍ കാളിരാജ് മഹേഷ് കുമാര്‍ അറിയിച്ചു. അന്വേഷണത്തില്‍ പൊലീസിന്റെ ഭാഗത്ത് വീഴ്ച സംഭവിച്ചിട്ടില്ലെന്നും അദ്ദേഹം വ്യക്തമാക്കി.

ടിനി ടോമിനെതിരെ പ്രഥമദൃഷ്ട്യാ കുറ്റം നിലനില്‍ക്കുന്നുവെന്നും, കേസ് രജിസ്റ്റര്‍ ചെയ്യാനാകില്ലെന്ന കടവന്ത്ര പൊലീസിന്റെ റിപ്പോര്‍ട്ട് അപൂര്‍ണമാണെന്നും കോടതി വിലയിരുത്തി. ഇതിന്റെ അടിസ്ഥാനത്തില്‍ ക്രിമിനല്‍ പ്രൊസീജര്‍ കോഡിലെ വകുപ്പ് 173 പ്രകാരം കേസ് രജിസ്റ്റര്‍ ചെയ്ത് തുടര്‍നടപടി സ്വീകരിക്കാന്‍ പൊലീസിന് നിര്‍ദേശം നല്‍കി.

ടിനി ടോം നടത്തിയതായി പരാതിയിലുള്ള ജിഹാദി പരാമര്‍ശങ്ങള്‍ ഉള്‍പ്പെടെയുള്ള പ്രസ്താവനകള്‍ തമാശയുടെ ഭാഗമായിരുന്നുവെന്നായിരുന്നു കടവന്ത്ര പൊലീസിന്റെ റിപ്പോര്‍ട്ട്. എന്നാല്‍ ഈ വിശദീകരണം മതിയായതല്ലെന്നാണ് കോടതിയുടെ കണ്ടെത്തല്‍.

കോടതി ഉത്തരവിന്റെ പകര്‍പ്പ് ലഭിക്കുന്നതോടെ കേസ് രജിസ്റ്റര്‍ ചെയ്യുമെന്ന് കടവന്ത്ര സ്റ്റേഷന്‍ ഹൗസ് ഓഫീസര്‍ (SHO) അറിയിച്ചു. നേരത്തെ അന്വേഷണത്തില്‍ പൊലീസ് വീഴ്ച വരുത്തിയെന്ന ആരോപണവുമായി അന്‍സിബ ഹസനും രംഗത്തെത്തിയിരുന്നു.

അഭിനേതാക്കളുടെ സംഘടനയായ അമ്മയിലെ ആഭ്യന്തര തര്‍ക്കങ്ങളുടെ പശ്ചാത്തലത്തിലാണ് വിവാദം കോടതിയിലെത്തിയത്. അതേസമയം, തനിക്കെതിരായ എല്ലാ ആരോപണങ്ങളും ടിനി ടോം നിഷേധിച്ചിട്ടുണ്ട്. അമ്മയുടെ മുന്‍ പ്രസിഡന്റ് ശ്വേത മേനോനും മുന്‍ വൈസ് പ്രസിഡന്റ് ലക്ഷ്മിപ്രിയയ്ക്കുമെതിരെയും അന്‍സിബ ഹസന്‍ പൊലീസില്‍ പരാതി നല്‍കിയിട്ടുണ്ട്.