വീര്യം കുറഞ്ഞ മദ്യം ഉത്പാദിപ്പിക്കണമെന്നതാണ് എല്‍ഡിഎഫ് നയം; മുഖ്യമന്ത്രിയുടെ ആരോപണങ്ങള്‍ക്ക് മറുപടിയുമായി എം.വി. ഗോവിന്ദന്‍

വീര്യം കുറഞ്ഞ മദ്യം ഉത്പാദിപ്പിക്കുന്നതുമായി ബന്ധപ്പെട്ട് മുഖ്യമന്ത്രി വി.ഡി. സതീശന്‍ ഉന്നയിച്ച ആരോപണങ്ങള്‍ക്ക് മറുപടിയുമായി സിപിഐഎം സംസ്ഥാന സെക്രട്ടറി എം.വി. ഗോവിന്ദന്‍. വീര്യം കുറഞ്ഞ മദ്യം ഉത്പാദിപ്പിക്കണമെന്നതാണ് എല്‍ഡിഎഫിന്റെ നയമെന്നും, കശുമാങ്ങ ഉള്‍പ്പെടെയുള്ള കാര്‍ഷിക ഉല്‍പ്പന്നങ്ങള്‍ ഉപയോഗിച്ച് ഇത്തരം മദ്യം നിര്‍മിക്കുന്നത് കര്‍ഷകര്‍ക്ക് ഗുണകരമാകുമെന്നും അദ്ദേഹം പറഞ്ഞു.

വീര്യം കുറഞ്ഞ മദ്യത്തെക്കുറിച്ച് വ്യക്തമായ നിര്‍വചനം ആവശ്യമാണെന്നും, ഉത്പാദന നയത്തെ നികുതി കുറയ്ക്കുന്ന തീരുമാനവുമായി എങ്ങനെ ബന്ധിപ്പിക്കാനാകുമെന്ന് മനസിലാകുന്നില്ലെന്നും എം.വി. ഗോവിന്ദന്‍ ചോദിച്ചു. മുന്‍ എല്‍ഡിഎഫ് സര്‍ക്കാരിന്റെ കാലത്തും ഇത്തരം അപേക്ഷകള്‍ ലഭിച്ചിരുന്നുവെന്നും, വീര്യം കുറഞ്ഞ മദ്യം കൊണ്ടുവരികയല്ല, ഉത്പാദിപ്പിക്കുകയാണ് സര്‍ക്കാരിന്റെ നയമെന്നും അദ്ദേഹം വ്യക്തമാക്കി.

എക്സൈസ് മന്ത്രിയായിരുന്ന കാലത്ത് വിഷയം ഗൗരവമായി ചര്‍ച്ച ചെയ്തിരുന്നുവെന്നും, അതിനുശേഷമാണ് വീര്യം കുറഞ്ഞ മദ്യത്തിന്റെ വിതരണവുമായി ബന്ധപ്പെട്ട് വിവിധ കമ്പനികളില്‍ നിന്ന് കത്തുകള്‍ ലഭിച്ചതെന്നും എം.വി. ഗോവിന്ദന്‍ പറഞ്ഞു.

2022 ജനുവരിയില്‍ ഈ വിഷയം സബ്ജക്ട് കമ്മിറ്റിക്ക് വിട്ടിരുന്നുവെന്നും, അന്ന് താന്‍ എക്സൈസ് മന്ത്രിയായിരുന്നില്ലെന്നും അദ്ദേഹം വിശദീകരിച്ചു. ഫയലില്‍ ഉണ്ടായിരുന്നെങ്കിലും പിന്നീട് ചര്‍ച്ച ചെയ്യാതെ തുടരുകയായിരുന്നുവെന്നും, പുതിയ സര്‍ക്കാര്‍ അധികാരമേറ്റ മൂന്നാം ദിവസം തന്നെ ഈ ഫയല്‍ മുഖ്യമന്ത്രിയുടെ പരിഗണനയ്‌ക്കെത്തിയതായും അദ്ദേഹം പറഞ്ഞു.