ലൈംഗിക അതിക്രമകേസ്: സംവിധായകന്‍ രഞ്ജിത്ത് കുറ്റക്കാരനെന്ന് കുറ്റപത്രം

കൊച്ചി:  ലൈംഗിക അതിക്രമകേസില്‍ സംവിധായകന്‍ രഞ്ജിത്ത് കുറ്റക്കാരനെന്ന് കുറ്റപത്രം. രഞ്ജിത്തിനെതിരെ ശക്തമായ സാക്ഷിമൊഴികളും ശാസ്ത്രീയ തെളിവുകളും ശേഖരിക്കാന്‍ കഴിഞ്ഞിട്ടുണ്ടെന്നാണ് ഉദ്യോഗസ്ഥര്‍ വ്യക്തമാക്കുന്നത്. കേസില്‍ കുറ്റപത്രം കോടതിയില്‍ സമര്‍പ്പിക്കുന്നതിനായി ഉന്നത പോലീസ് ഉദ്യോഗസ്ഥരുടെ ഔദ്യോഗിക അനുമതിയും ലഭിച്ചുകഴിഞ്ഞു. രണ്ടര മാസത്തെ വിശദമായ അന്വേഷണത്തിനൊടുവിലാണ് പ്രത്യേക സംഘം കുറ്റപത്രം തയാറാക്കിയത്. ഉദയംപേരൂര്‍ സ്റ്റേഷന്‍ ഹൗസ് ഓഫീസര്‍ക്കാണ് (എസ്എച്ച്ഒ) ഈ കേസിലെ അന്വേഷണ ചുമതല ഉണ്ടായിരുന്നത്.

ഫോര്‍ട്ട് കൊച്ചിയിലെ സിനിമ ഷൂട്ടിംഗ് ലൊക്കേഷനില്‍ വെച്ച് കാരവാനിലേക്ക് വിളിച്ചുവരുത്തിയ ശേഷം സംവിധായകന്‍ രഞ്ജിത്ത് തന്നോട് അപമര്യാദയായി പെരുമാറുകയും ലൈംഗികമായി അതിക്രമിക്കാന്‍ ശ്രമിക്കുകയും ചെയ്തുവെന്നാണ് യുവതിയുടെ മൊഴി. ഇതേ തുടര്‍ന്നാണ് സംവിധായകനെതിരെ പോലീസ് കേസെടുത്തത്. സിനിമാ സെറ്റിലുണ്ടായിരുന്ന പലരും സംഭവത്തില്‍ നിര്‍ണായക സാക്ഷികളാണ്. പ്രതി സ്വാധീനമുള്ള വ്യക്തിയായതിനാല്‍ സാക്ഷികളെ സ്വാധീനിക്കാന്‍ സാധ്യതയുണ്ടെന്ന് പ്രൊസിക്യൂഷന്‍ ചൂണ്ടിക്കാണിച്ചിരുന്നു.

ഈ വര്‍ഷം മാര്‍ച്ച് 28-നാണ് സംഭവവുമായി ബന്ധപ്പെട്ട് യുവതി പോലീസില്‍ പരാതി നല്‍കുന്നത്. ഇതിന്റെ അടിസ്ഥാനത്തില്‍ എറണാകുളം നോര്‍ത്ത് വനിതാ പോലീസ് സ്റ്റേഷനില്‍ പ്രാഥമികമായി എഫ്‌ഐആര്‍ രജിസ്റ്റര്‍ ചെയ്യുകയായിരുന്നു. കേസ് രജിസ്റ്റര്‍ ചെയ്തതിനെ തുടര്‍ന്ന് മുന്‍പ് തൊടുപുഴയില്‍ വെച്ച് രഞ്ജിത്തിനെ പോലീസ് അറസ്റ്റ് ചെയ്തിരുന്നു. തുടര്‍ന്ന് കോടതി ഇദ്ദേഹത്തെ ജുഡീഷ്യല്‍ കസ്റ്റഡിയില്‍ വിട്ടെങ്കിലും പിന്നീട് കര്‍ശന ഉപാധികളോടെ ജാമ്യം അനുവദിക്കുകയായിരുന്നു. നിലവില്‍ ജാമ്യത്തില്‍ കഴിയുന്ന രഞ്ജിത്തിനെതിരെ കുറ്റപത്രം സമര്‍പ്പിക്കുന്നതോടെ കേസില്‍ വിചാരണ നടപടികള്‍ ഉടന്‍ ആരംഭിക്കും.