ജൂണ്‍ 15 മുതല്‍ സ്ത്രീകള്‍ക്ക് കെഎസ്ആര്‍ടിസി ഓര്‍ഡിനറി ബസുകളില്‍ സൗജന്യ യാത്ര

തിരുവനന്തപുരം: സംസ്ഥാനത്തെ കെഎസ്ആര്‍ടിസി ഓര്‍ഡിനറി ബസുകളില്‍ ജൂണ്‍ 15 മുതല്‍ സ്ത്രീകള്‍ക്ക് സൗജന്യ യാത്ര അനുവദിക്കുമെന്ന് മുഖ്യമന്ത്രി വി.ഡി. സതീശന്‍ പ്രഖ്യാപിച്ചു. പ്രിയദര്‍ശിനി എന്ന പേരില്‍ നടപ്പാക്കുന്ന പദ്ധതിയുടെ ആനുകൂല്യം വരുമാനമോ പ്രായമോ പരിഗണിക്കാതെയാണ് ലഭ്യമാകുക. ട്രാന്‍സ്‌ജെന്‍ഡര്‍ വിഭാഗത്തിനും സൗജന്യ യാത്രാ സൗകര്യം ലഭിക്കും.

പദ്ധതി മൂലം കെഎസ്ആര്‍ടിസിക്ക് ഉണ്ടാകുന്ന സാമ്പത്തിക ബാധ്യത സര്‍ക്കാര്‍ ഏറ്റെടുക്കുമെന്നും മുഖ്യമന്ത്രി വാര്‍ത്താസമ്മേളനത്തില്‍ അറിയിച്ചു. ഏകദേശം 800 കോടി രൂപയുടെ വാര്‍ഷിക ബാധ്യതയാണ് പദ്ധതിയിലൂടെ ഉണ്ടാകുകയെന്നും അദ്ദേഹം വ്യക്തമാക്കി.

രക്ഷാപ്രവര്‍ത്തന കേസില്‍ മുന്‍കൂര്‍ ജാമ്യം അനുവദിച്ച കോടതി വിധി സര്‍ക്കാര്‍ പരിശോധിക്കുമെന്നും മുഖ്യമന്ത്രി പറഞ്ഞു. കോടതി വിധികളെക്കുറിച്ച് സര്‍ക്കാര്‍ പ്രതികരിക്കാറില്ലെന്നും അദ്ദേഹം കൂട്ടിച്ചേര്‍ത്തു. സലിംകുമാറിന്റെ വീട്ടില്‍ നവമാധ്യമങ്ങളുടെ അമിത തിരക്ക് ഉണ്ടായിരുന്നുവെന്നും, മരണശേഷവും അദ്ദേഹത്തിനെതിരെ സൈബര്‍ ആക്രമണങ്ങള്‍ നടന്നതായും മുഖ്യമന്ത്രി അഭിപ്രായപ്പെട്ടു.

രാഷ്ട്രീയ വിഷയങ്ങളുമായി ബന്ധപ്പെട്ട ചോദ്യങ്ങള്‍ക്ക് മറുപടിയായി, സിപിഎമ്മിനെ തോല്‍പ്പിക്കുന്നത് എളുപ്പമാണെങ്കിലും തോറ്റെന്ന് സമ്മതിപ്പിക്കുക പ്രയാസമാണെന്ന് മുഖ്യമന്ത്രി പറഞ്ഞു. ബി. അശോകിന്റെ നിയമനവുമായി ബന്ധപ്പെട്ട വിമര്‍ശനങ്ങള്‍ക്ക് മറുപടിയായി, ഉദ്യോഗസ്ഥരുടെ രാഷ്ട്രീയ നിലപാട് നോക്കിയല്ല നിയമനങ്ങള്‍ നടത്തുന്നതെന്നും അദ്ദേഹം വ്യക്തമാക്കി.