പിണറായി വിജയന്‍ പ്രതിപക്ഷ നേതാവായേക്കും; സി.പി.ഐ.എം സംസ്ഥാന സെക്രട്ടറിയേറ്റ് ഇന്ന് തീരുമാനമെടുക്കും

പിണറായി വിജയന്‍ പ്രതിപക്ഷ നേതാവ് ചുമതല ഏറ്റെടുക്കാന്‍ സാധ്യത. ഇന്നത്തെ സിപിഐഎം സംസ്ഥാന സെക്രട്ടറിയേറ്റ് യോഗത്തില്‍ തീരുമാനമുണ്ടാകും. കഴിഞ്ഞ പത്ത് വര്‍ഷത്തെ ഭരണപരിജ്ഞാനമുള്ള മുതിര്‍ന്ന നേതാവ് തന്നെ പ്രതിപക്ഷത്തെ നയിക്കണമെന്ന ആവശ്യം പാര്‍ട്ടിയിലെ ഒരു വിഭാഗം നേതാക്കള്‍ മുന്നോട്ടുവെച്ചിട്ടുണ്ട്.

തിരഞ്ഞെടുപ്പ് പ്രചാരണത്തിന് നേതൃത്വം നല്‍കിയ പിണറായി വിജയന്‍ തന്നെ പാര്‍ലമെന്ററി പാര്‍ട്ടി നേതാവാകുന്നത് അണികള്‍ക്കിടയില്‍ ആത്മവിശ്വാസം നല്‍കുമെന്നാണ് വിലയിരുത്തല്‍. സംഘടനാ തലത്തിലും പാര്‍ലമെന്ററി രംഗത്തും ഒരേസമയം വലിയ അഴിച്ചുപണികള്‍ നടത്തുന്നത് തെറ്റായ സന്ദേശം നല്‍കുമെന്ന ആശങ്കയും നേതൃത്വത്തിനുണ്ട്. കേന്ദ്ര കമ്മിറ്റി അംഗം എം.എ. ബേബി ഉള്‍പ്പെടെയുള്ള മുതിര്‍ന്ന നേതാക്കള്‍ പങ്കെടുക്കുന്ന സെക്രട്ടറിയേറ്റ് യോഗത്തില്‍ തോല്‍വിയുടെ കാരണങ്ങളും വിശദമായി പരിശോധിക്കും.

അതേസമയം, ഭരണവിരുദ്ധ വികാരം തിരഞ്ഞെടുപ്പില്‍ പ്രതിഫലിച്ചതിനെക്കുറിച്ച് സി.പി.ഐ നേതൃത്വവും ഇന്ന് ചര്‍ച്ച നടത്തും. സി.പി.ഐ സംസ്ഥാന സെക്രട്ടേറിയറ്റും എക്‌സിക്യൂട്ടീവും ഇന്ന് ചേരുന്നുണ്ട്. കനത്ത തോല്‍വിയുടെ പശ്ചാത്തലത്തില്‍ പാര്‍ട്ടി സംസ്ഥാന നേതൃത്വത്തിനെതിരെ യോഗത്തില്‍ രൂക്ഷമായ വിമര്‍ശനങ്ങള്‍ ഉയര്‍ന്നേക്കാം. എല്‍.ഡി.എഫിനുണ്ടായ തിരിച്ചടിയില്‍ ഘടകകക്ഷികള്‍ക്കിടയിലുള്ള അതൃപ്തി വരും ദിവസങ്ങളില്‍ മുന്നണി ബന്ധത്തെ എങ്ങനെ ബാധിക്കുമെന്നതും രാഷ്ട്രീയ കേന്ദ്രങ്ങള്‍ ഉറ്റുനോക്കുന്നു.

മുഖ്യമന്ത്രി സ്ഥാനം രാജിവച്ച പിണറായി വിജയന്‍ ഇന്ന് ഔദ്യോഗിക വസതിയായ ക്ലിഫ് ഹൗസ് ഒഴിയും. എ.കെ.ജി സെന്ററിന് സമീപം പി.ബി അംഗങ്ങള്‍ക്കായി അനുവദിച്ചിട്ടുള്ള ഫ്‌ലാറ്റിലേക്കാണ് അദ്ദേഹം താമസം മാറുന്നത്. പാര്‍ട്ടിയിലെയും ഭരണത്തിലെയും പദവികള്‍ ഒഴിഞ്ഞ ശേഷമുള്ള പിണറായി വിജയന്റെ അടുത്ത നീക്കങ്ങള്‍ കേരള രാഷ്ട്രീയത്തില്‍ വന്‍ മാറ്റങ്ങള്‍ക്ക് വഴിതെളിച്ചേക്കാം.