എ.ഡി.എം നവീന്‍ ബാബുവിന്റെ മരണം: സര്‍ക്കാര്‍ പ്രത്യേക അന്വേഷണ സമിതിയെ നിയോഗിച്ചു; അന്വേഷിക്കുന്നത് 6 കാര്യങ്ങള്‍

തിരുവനന്തപുരം: എ.ഡി.എം നവീന്‍ ബാബുവിന്റെ മരണവുമായി ബന്ധപ്പെട്ട് സമഗ്രമായ അന്വേഷണത്തിന് സര്‍ക്കാര്‍ പ്രത്യേക അന്വേഷണ സമിതിയെ നിയോഗിച്ചു. എ.ഡി.എമ്മിന്റെ മരണവുമായി ബന്ധപ്പെട്ട് കണ്ണൂര്‍ ജില്ലാ കളക്ടര്‍ സമര്‍പ്പിച്ച പ്രാഥമിക റിപ്പോര്‍ട്ട് പരിശോധിച്ചതിനുശേഷം ആണ് പ്രത്യേക അന്വേഷണ സമിതിയെ നിയോഗിക്കാന്‍ തീരുമാനമായത്. പ്രത്യേക അന്വേഷണ സമിതിയുടെ ചുമതല എ.ഗീത ഐ.എ.എസിനാണ്.

മുന്‍ എ.ഡി.എമ്മിന്റെ മരണത്തിലേക്ക് നയിച്ച സംഭവങ്ങള്‍, എ.ഡി.എമ്മിനെതിരെ ജില്ലാ പഞ്ചായത്ത് പ്രസിഡന്റ് ഉന്നയിച്ച ആരോപണങ്ങള്‍, എ.ഡി.എം നവീന്‍ ബാബുവിനെതിരേയുള്ള മുന്‍ പഞ്ചായത്ത് പ്രസിഡന്റിന്റെ ആരോപണങ്ങളെ പിന്തുണയ്ക്കുന്ന വിധത്തിലുള്ള എന്തെങ്കിലും തെളിവുകള്‍ ഹാജരാക്കിയിട്ടുണ്ടോ, എന്‍.ഒ.സി പുറപ്പെടുവിക്കുന്നതുമായി ബന്ധപ്പെട്ട് ആരോപിക്കപ്പെടുന്ന ഫയല്‍ പരിശോധന, എന്‍.ഒ.സി പുറപ്പെടുവിപ്പിക്കാന്‍ എത്ര സമയം എടുത്തു, കാലതാമസം ഉണ്ടായിട്ടുണ്ടോ?, സാധാരണ നിലയില്‍ ഒരു എന്‍.ഒ.സി പുറപ്പെടുവിക്കാന്‍ എത്ര സമയം എടുക്കും, എന്‍.ഒ.സി നല്‍കുന്നതുമായി ബന്ധപ്പെട്ട ഫയല്‍ പരിശോധിച്ച് ഏതെങ്കിലും തെറ്റായ പ്രവൃത്തിയുടെ തെളിവ് അല്ലെങ്കില്‍ സൂചന, അന്വേഷണ ഉദ്യോഗസ്ഥന്‍ പ്രസക്തമെന്ന് കരുതുന്ന മറ്റേതെങ്കിലും പ്രശ്‌നങ്ങള്‍ എന്നീ കാര്യങ്ങളാണ് അന്വേഷിക്കുന്നത്. .

അതേസമയം ജില്ലാ കലക്ടര്‍ ക്ഷണിച്ചത് പ്രകാരമാണ് യാത്രയയപ്പ് ചടങ്ങില്‍ എത്തിയതെന്നും. സദുദ്ദേശത്തോടെയുള്ള സംസാരമാണ് നടത്തിയതെന്നും ദിവ്യ ജാമ്യഹര്‍ജിയില്‍ പറയുന്നു. ഒളിച്ചോടില്ലെന്നും പിപി ദിവ്യ വ്യക്തമാക്കി. എന്നാല്‍ അപ്രതീക്ഷിതമായാണ് ദിവ്യ പരിപാടിയില്‍ എത്തിയതെന്നും ക്ഷണിച്ചതായി അറിയില്ലെന്നുമാണ് യാത്രയയപ്പ് പരിപാടിയില്‍ പങ്കെടുത്ത കളക്ടറേറ്റ് ജീവനക്കാര്‍ മൊഴി നല്‍കിയത്.

ദിവ്യയുടെ പ്രസംഗത്തിന് ശേഷം നവീന് മാനസിക പ്രയാസം ഉള്ളതായി തോന്നിയിരുന്നു. നവീന്‍ ബാബുവിന്റെ മറുപടി പ്രസംഗം ചുരുക്കം വാക്കുകളിലായിരുന്നു. രണ്ടോ മൂന്നോ മിനിറ്റ് മാത്രമാണ് എ.ഡി.എം സംസാരിച്ചത്. ജില്ലാ കളക്ടറും പ്രസംഗം ചുരുക്കിയിരുന്നു. യാത്രയയപ്പില്‍ ദിവ്യ മാത്രമാണ് എ.ഡി.എമ്മിനെ കുറ്റപ്പെടുത്തി സംസാരിച്ചതെന്നും ജീവനക്കാരുടെ മൊഴിയിലുണ്ട്.

യാത്രയയപ്പ് ചടങ്ങിനിടെ കണ്ണൂര്‍ ജില്ലാ പഞ്ചായത്ത് പ്രസിഡന്റ് പി.പി. ദിവ്യ നടത്തിയ ആരോപണങ്ങള്‍ക്ക് പിന്നാലെയായിരുന്നു നവീന്‍ ബാബു ജീവനൊടുക്കിയത്. എ.ഡി.എം കൈക്കൂലി ആവശ്യപ്പെട്ടിരുന്നുവെന്ന് ആരോപിച്ച പി.പി. ദിവ്യ പത്തനംതിട്ടയില്‍ ഈ രീതിയില്‍ പ്രവര്‍ത്തിക്കരുതെന്നും പറഞ്ഞിരുന്നു. രണ്ട് ദിവസത്തിനകം മറ്റു വെളിപ്പെടുത്തലുണ്ടാകുമെന്നും ദിവ്യ പറഞ്ഞിരുന്നു. ഇതിന് പിന്നാലെ നവീന്‍ ബാബുവിനെ ക്വാര്‍ട്ടേഴ്സില്‍ തൂങ്ങി മരിച്ച നിലയില്‍ കണ്ടെത്തുകയായിരുന്നു.

ദിവ്യയ്ക്കെതിരെ ആത്മഹത്യാപ്രേരണ കുറ്റത്തിന് കേസെടുത്തതിന് പിന്നാലെയാണ് യാത്രയയപ്പ് ചടങ്ങില്‍ പങ്കെടുത്ത ജീവനക്കാരുടെ മൊഴിയെടുത്തത്. നവീന്‍ ബാബുവിന്റെ കുടുംബത്തിന്റെയും മൊഴി രേഖപ്പെടുത്തിയിട്ടുണ്ട്. അതേസമയം കേസില്‍ മുന്‍കൂര്‍ ജാമ്യം തേടി ദിവ്യ കോടതിയെ സമീപിച്ചിട്ടുണ്ട്. ഹര്‍ജിയില്‍ കക്ഷി ചേരാനാണ് നവീന്റെ കുടുംബത്തിന്റെ തീരുമാനം.