ആര്‍ വി ബാബുവിന്റെ ആരോപണം തള്ളി വി.ഡി. സതീശന്‍; ശബരിമല സ്വര്‍ണക്കൊള്ളയില്‍ സര്‍ക്കാരിനെതിരെ രൂക്ഷ വിമര്‍ശനം

ഹിന്ദു ഐക്യവേദി നേതാവ് ആര്‍ വി ബാബു ഉന്നയിച്ച ആരോപണങ്ങള്‍ പ്രതിപക്ഷ നേതാവ് വി.ഡി. സതീശന്‍ തള്ളി. താന്‍ ആരെയും കാണാനോ ചര്‍ച്ചകള്‍ നടത്താനോ എവിടെയും പോയിട്ടില്ലെന്ന് അദ്ദേഹം വ്യക്തമാക്കി. ആര്‍എസ്എസ് നേതാക്കളുമായി ചര്‍ച്ച നടത്തിയതാകട്ടെ മുഖ്യമന്ത്രിയാണെന്നും, ശ്രീ എംമുമായി നടത്തിയ കൂടിക്കാഴ്ചയുടെ ഉദ്ദേശം എന്താണെന്നും മുഖ്യമന്ത്രി വ്യക്തമാക്കണമെന്ന് സതീശന്‍ ചോദിച്ചു.

വെല്‍ഫെയര്‍ പാര്‍ട്ടി യുഡിഎഫിനെ പിന്തുണച്ചാല്‍ അതില്‍ എന്താണ് പ്രശ്‌നമെന്നും, പിഡിപിയുമായും ജമാഅത്തെ ഇസ്ലാമിയുമായും സിപിഐഎമ്മിന് മുമ്പ് ബന്ധമുണ്ടായിരുന്നുവെന്നും അദ്ദേഹം ആരോപിച്ചു.

ഇതിനിടെ ശബരിമലയില്‍ നടന്ന സ്വര്‍ണക്കൊള്ള കേസില്‍ സര്‍ക്കാരിനെയും സിപിഐഎമ്മിനെയും സതീശന്‍ രൂക്ഷമായി വിമര്‍ശിച്ചു. കവര്‍ച്ച നടത്തിയവരെ പാര്‍ട്ടിയും സര്‍ക്കാരും സംരക്ഷിക്കുകയാണെന്നും, പ്രതികള്‍ക്കെതിരെ നടപടി സ്വീകരിക്കാന്‍ സിപിഐഎമ്മിന് ഭയമാണെന്നും അദ്ദേഹം ആരോപിച്ചു. മുഖ്യമന്ത്രി വിഷയത്തില്‍ നിന്ന് ഒഴിഞ്ഞുമാറുകയാണെന്നും അദ്ദേഹം പറഞ്ഞു.

അയ്യപ്പന്റെ സ്വര്‍ണം പാര്‍ട്ടി നേതാക്കളാണ് മോഷ്ടിച്ചതെന്ന് കണ്ടെത്തിയിട്ടുണ്ടെന്നും, കുറ്റപത്രം സമര്‍പ്പിക്കാത്തതുകൊണ്ടാണ് പ്രതികള്‍ക്ക് രക്ഷ ലഭിച്ചതെന്നും സതീശന്‍ ആരോപിച്ചു. കേസിലെ പ്രധാന പ്രതി ഇപ്പോഴും ജില്ലാ കമ്മിറ്റി അംഗമായിരിക്കുകയാണെന്നും, പ്രതികള്‍ക്ക് സര്‍ക്കാരും പാര്‍ട്ടിയും പൂര്‍ണ്ണ സംരക്ഷണം നല്‍കുകയാണെന്നും അദ്ദേഹം പറഞ്ഞു. വിഷയത്തില്‍ മുഖ്യമന്ത്രി വ്യക്തമായ മറുപടി നല്‍കണമെന്ന് വി.ഡി. സതീശന്‍ ആവശ്യപ്പെട്ടു.