രാജ്യത്ത് ആദ്യം: ഹരീഷ് റാണയ്ക്ക് ദയാവധം അനുവദിച്ച് സുപ്രീംകോടതി

ന്യൂഡല്‍ഹി: കഴിഞ്ഞ 13 വര്‍ഷമായി അബോധാവസ്ഥയില്‍ കഴിയുന്ന 32-കാരന്‍ ഹരീഷ് റാണയ്ക്ക് ദയാവധം അനുവദിക്കാന്‍ സുപ്രീം കോടതി ഉത്തരവിട്ടു. തന്റെ മകന്റെ ദുരിതാവസ്ഥ കണ്ട് മനംനൊന്ത് മാതാപിതാക്കള്‍ നല്‍കിയ ഹര്‍ജിയിലാണ് ചരിത്രപ്രധാനമായ ഈ വിധി. നിലവില്‍ ഡല്‍ഹി എയിംസില്‍ ചികിത്സയില്‍ കഴിയുകയാണ് ഹരീഷ്.

2013 ഓഗസ്റ്റില്‍ കെട്ടിടത്തിന്റെ നാലാം നിലയില്‍ നിന്ന് വീണതിനെത്തുടര്‍ന്നാണ് നോയിഡ സ്വദേശിയായ ഹരീഷിന്റെ ശരീരം തളര്‍ന്നത്. ചലനശേഷി പൂര്‍ണ്ണമായും നഷ്ടപ്പെട്ട ഹരീഷിന് ട്യൂബിലൂടെയാണ് ഭക്ഷണവും ഓക്‌സിജനും നല്‍കിക്കൊണ്ടിരിക്കുന്നത്. ശരീരം ആകെ മുറിവുകളാല്‍ നിറഞ്ഞ നിലയിലാണെന്നും സുഖപ്പെടാന്‍ സാധ്യതയില്ലെന്നും മെഡിക്കല്‍ റിപ്പോര്‍ട്ടുകള്‍ സൂചിപ്പിക്കുന്നു.

തിരിച്ചുവരവ് അസാധ്യമായ സാഹചര്യത്തില്‍, കൃത്രിമ ജീവന്‍രക്ഷാ ഉപകരണങ്ങളിലൂടെ ഒരാളുടെ ആയുസ്സ് നീട്ടുന്നത് ആ വ്യക്തിയുടെ അന്തസ്സിനു വിരുദ്ധമാണെന്ന് കോടതി നിരീക്ഷിച്ചു. ഇന്ത്യയില്‍ മരുന്നുകളോ ഇന്‍ജക്ഷനോ നല്‍കിയുള്ള  ആക്ടീവ് യുത്തനേസ്യക്ക് അനുമതിയില്ലെങ്കിലും, മരുന്നും ഭക്ഷണവും ഘട്ടംഘട്ടമായി നിര്‍ത്തിക്കൊണ്ടുള്ള പാസീവ് യുത്തനേസ്യ കോടതി അംഗീകരിക്കുകയായിരുന്നു.