തിരുവല്ല സീറ്റ് കേരള കോണ്‍ഗ്രസ് ജോസഫ് വിഭാഗത്തില്‍ നിന്ന് ഏറ്റെടുക്കണം: ആവശ്യം ശക്തമാക്കി കോണ്‍ഗ്രസ്

പത്തനംതിട്ട: വരാനിരിക്കുന്ന നിയമസഭാ തിരഞ്ഞെടുപ്പില്‍ തിരുവല്ല സീറ്റ് കേരള കോണ്‍ഗ്രസ് ജോസഫ് വിഭാഗത്തില്‍ നിന്ന് കോണ്‍ഗ്രസ് ഏറ്റെടുക്കണമെന്ന ആവശ്യവുമായി പത്തനംതിട്ട ജില്ലാ കോണ്‍ഗ്രസ് കമ്മിറ്റി (ഡിസിസി). കഴിഞ്ഞ ദിവസം ചേര്‍ന്ന ഡിസിസി എക്‌സിക്യൂട്ടീവ് യോഗത്തിലാണ് ഈ ആവശ്യം ശക്തമായി ഉയര്‍ന്നത്. സീറ്റ് വിഭജന ചര്‍ച്ചകള്‍ ഔദ്യോഗികമായി ആരംഭിക്കുന്നതിന് മുന്നോടിയായി ഈ നിലപാട് കെപിസിസി നേതൃത്വത്തെയും ഹൈക്കമാന്‍ഡിനെയും അറിയിക്കാനാണ് ജില്ലാ ഘടകത്തിന്റെ തീരുമാനം.

കഴിഞ്ഞ അഞ്ച് നിയമസഭാ തിരഞ്ഞെടുപ്പുകളിലും യുഡിഎഫ് ബാനറില്‍ കേരള കോണ്‍ഗ്രസ് സ്ഥാനാര്‍ത്ഥികളാണ് തിരുവല്ലയില്‍ മത്സരിച്ചത്. എന്നാല്‍ 2001-ല്‍ മാമ്മന്‍ മത്തായി വിജയിച്ചതിന് ശേഷം മണ്ഡലത്തില്‍ യുഡിഎഫിന് ജയിക്കാന്‍ സാധിച്ചിട്ടില്ല. നിലവിലെ എല്‍ഡിഎഫ് എംഎല്‍എ മാത്യു ടി. തോമസിന് മാര്‍ത്തോമ്മ സഭയുമായുള്ള ശക്തമായ സ്വാധീനത്തെ മറികടക്കാന്‍ കോണ്‍ഗ്രസ് നേരിട്ട് രംഗത്തിറങ്ങണമെന്നാണ് പാര്‍ട്ടി പ്രവര്‍ത്തകരുടെ വാദം. മാര്‍ത്തോമ്മ സഭയുടെ ആസ്ഥാനമായ തിരുവല്ലയില്‍ സഭയുമായി ദീര്‍ഘകാല ബന്ധമുള്ള നേതാക്കളെ പരിഗണിക്കണമെന്നും യോഗത്തില്‍ അഭിപ്രായമുയര്‍ന്നു. സഭാംഗവും മുന്‍ ജില്ലാ പഞ്ചായത്ത് വൈസ് പ്രസിഡന്റുമായ ജോര്‍ജ് മാമന്‍ കൊണ്ടൂര്‍ ഉള്‍പ്പെടെയുള്ളവരുടെ പേരുകള്‍ നിലവില്‍ സജീവമായി പരിഗണിക്കപ്പെടുന്നുണ്ട്.

തിരുവല്ല സീറ്റ് ഏറ്റെടുക്കുന്നതിന് പകരമായി, നിലവില്‍ കോണ്‍ഗ്രസ് മത്സരിക്കുന്ന റാന്നി സീറ്റ് കേരള കോണ്‍ഗ്രസ് ജോസഫ് വിഭാഗത്തിന് വിട്ടുനല്‍കുക എന്ന രാഷ്ട്രീയ സമവാക്യമാണ് ഡിസിസി മുന്നോട്ടുവെക്കുന്നത്. കഴിഞ്ഞ തദ്ദേശ തിരഞ്ഞെടുപ്പുകളില്‍ തിരുവല്ല നഗരസഭയിലും വിവിധ പഞ്ചായത്തുകളിലും കോണ്‍ഗ്രസ് കാഴ്ചവെച്ച മികച്ച പ്രകടനം മണ്ഡലം തിരിച്ചുപിടിക്കാനുള്ള ആത്മവിശ്വാസം നല്‍കുന്നതായി നേതാക്കള്‍ ചൂണ്ടിക്കാട്ടുന്നു.