നടിയെ ആക്രമിച്ച കേസ്: ആറു പ്രതികള്‍ക്കും ജീവപര്യന്തം ആവശ്യപ്പെടാന്‍ പ്രോസിക്യൂഷന്‍

കൊച്ചി: നടിയെ ആക്രമിച്ച കേസില്‍ കുറ്റക്കാരാണെന്ന് കോടതി കണ്ടെത്തിയ ആറു പ്രതികള്‍ക്കും പരമാവധി ശിക്ഷയായ ജീവപര്യന്തം നല്‍കണമെന്ന് പ്രോസിക്യൂഷന്‍ കോടതിയോട് ആവശ്യപ്പെടാനൊരുങ്ങുന്നു. ശിക്ഷ വിധിക്കാന്‍ കോടതി വെള്ളിയാഴ്ച കേസ് പരിഗണിക്കുമ്പോള്‍ സമൂഹത്തിന് പാഠമാകുന്ന കഠിനമായ ശിക്ഷ ഉറപ്പാക്കണമെന്ന് പ്രോസിക്യൂഷന്‍ അവതരിപ്പിക്കുമെന്ന് റിപ്പോര്‍ട്ടുകള്‍ പറയുന്നു.

എല്ലാ പ്രതികള്‍ക്കുമെതിരെ ബലാത്സംഗക്കുറ്റം ഉറപ്പായതായും, കുറ്റകൃത്യത്തിന്റെ ഗുരുത്വമനുസരിച്ച് വ്യത്യസ്ത ശിക്ഷകള്‍ നല്‍കുന്നത് ശരിയല്ലെന്നും പ്രോസിക്യൂഷന്‍ വിലയിരുത്തുന്നു. എല്ലാവരും ഒരുപോലെ കുറ്റക്കാരാണെന്നും, പ്രതികളുടെ പശ്ചാത്തലം തന്നെ സമൂഹത്തിന് ഭീഷണിയാണെന്നും പ്രോസിക്യൂഷന്‍ കോടതിയെ അറിയിക്കാനാണ് തീരുമാനം.

മുമ്പും ചില പ്രതികള്‍ സമാനമായ കുറ്റകൃത്യത്തിന് ശ്രമം നടത്തിയിട്ടുണ്ടെന്നതും, ആവര്‍ത്തന സാധ്യത ഒഴിവാക്കാന്‍ പരമാവധി ശിക്ഷ ആവശ്യമാണ് എന്നതുമാണ് പ്രോസിക്യൂഷന്റെ നിലപാട്.

എന്നാല്‍ പ്രതിഭാഗത്തിന്റെ വാദങ്ങള്‍ കേട്ട ശേഷമായിരിക്കും അന്തിമമായി ഈ ആവശ്യം കോടതിയില്‍ ഉന്നയിക്കുക.