ശബരിമല സ്വര്‍ണക്കൊള്ള കേസ്: രമേശ് ചെന്നിത്തലയുടെ മൊഴിയെടുപ്പ് മാറ്റി

തിരുവനന്തപുരം: ശബരിമല സ്വര്‍ണക്കൊള്ള കേസില്‍ കോണ്‍ഗ്രസ് നേതാവ് രമേശ് ചെന്നിത്തലയുടെ മൊഴിയെടുക്കുന്നത് അന്വേഷണ സംഘത്തിലെ ഉദ്യോഗസ്ഥരുടെ അസൗകര്യത്തെ തുടര്‍ന്ന് മറ്റൊരു ദിവസത്തേക്ക് മാറ്റി. നിര്‍ണായക വിവരങ്ങള്‍ കൈമാറാനുണ്ടെന്ന് വ്യക്തമാക്കിയതിനെ തുടര്‍ന്ന് തന്നെയാണ് ചെന്നിത്തല എസ്ഐടിയെ സമീപിച്ചത്.

ഒരു വ്യവസായിയാണ് തനിക്ക് വിവരങ്ങള്‍ നല്‍കിയത് എന്നതും, ആ വ്യവസായി രഹസ്യ മൊഴി നല്‍കാന്‍ തയ്യാറാണെന്നും ചെന്നിത്തല മാധ്യമങ്ങളോട് പറഞ്ഞു. സ്വര്‍ണപ്പാളി അന്താരാഷ്ട്ര വിപണിയില്‍ അമൂല്യവസ്തുവായി വിറ്റതെന്നും, 500 കോടിയിലേറെ വിലയുള്ള ഇടപാടാണ് നടന്നതെന്നും ചെന്നിത്തല ആരോപിച്ചു.

അന്താരാഷ്ട്ര കള്ളക്കടത്ത് സംഘവുമായി സ്വര്‍ണക്കൊള്ളയ്ക്ക് ബന്ധമുണ്ടെന്ന ചെന്നിത്തലയുടെ വെളിപ്പെടുത്തലിനെ തുടര്‍ന്ന് അന്വേഷണ സംഘം മൊഴിയെടുപ്പ് നിശ്ചയിച്ചിരുന്നു. ഇന്ന് ഈഞ്ചക്കലിലുള്ള ക്രൈം ബ്രാഞ്ച് ഓഫീസില്‍ മൊഴിയെടുപ്പ് നടത്താനിരിക്കുകയായിരുന്നുവെങ്കിലും ഉദ്യോഗസ്ഥര്‍ക്ക് ഉണ്ടായ അസൗകര്യം കാരണം മാറ്റുകയായിരുന്നു.

ഇതിനിടെ, ശബരിമല സ്വര്‍ണക്കൊള്ള കേസില്‍  നല്‍കിയ അപേക്ഷ പരിഗണിക്കുന്നത് 17-ലേക്ക് മാറ്റി. രേഖാമൂലം മറുപടി നല്‍കാന്‍ കൂടുതല്‍ സമയം ആവശ്യപ്പെട്ടതോടെയാണ് മാറ്റം. രേഖകള്‍ ഇഡിക്ക് കൈമാറുന്നതിനെതിരെ എസ്ഐടി നേരത്തെ തന്നെ എതിര്‍പ്പ് രേഖപ്പെടുത്തിയിരുന്നു.