ഷാഫി പറമ്പിലിനെ ആക്രമിച്ചത് സര്‍ക്കാരിനെ രക്ഷിക്കാന്‍; വി.ഡി. സതീശന്‍

തിരുവനന്തപുരം: ഷാഫി പറമ്പില്‍ എംപിയെ പൊലീസ് അതിക്രൂരമായി മര്‍ദിച്ച സംഭവത്തില്‍ പ്രതിപക്ഷം ശക്തമായ പ്രതികരണവുമായി രംഗത്ത്. പൊലീസ് നടപടി സര്‍ക്കാരിനെയും മുഖ്യമന്ത്രിയെയും ശബരിമല വിവാദത്തില്‍ നിന്ന് രക്ഷിക്കാന്‍ ലക്ഷ്യമിട്ടതാണെന്ന് പ്രതിപക്ഷ നേതാവ് വി.ഡി. സതീശന്‍ ആരോപിച്ചു.

ഷാഫിയുടെ ചോര നിലത്തു വീണിട്ടുണ്ടെങ്കില്‍ അതിന് പ്രതികാരം ചോദിക്കാതെ നില്‍ക്കില്ല, എന്ന് വി.ഡി. സതീശന്‍ മുന്നറിയിപ്പ് നല്‍കി. എല്ലാ വിഷയങ്ങളില്‍നിന്നും ജനങ്ങളുടെ ശ്രദ്ധ തിരിക്കാന്‍ സര്‍ക്കാരിന്റെ താത്പര്യം നോക്കിക്കൊണ്ട് പൊലീസ് ഇത്തരമൊരു ക്രൂരത കാട്ടിയതാണെന്നും അദ്ദേഹം ആരോപിച്ചു.

സര്‍ക്കാരിന്റെ ശമ്പളം വാങ്ങുന്ന പൊലീസുകാര്‍ എ.കെ.ജി. സെന്ററില്‍ നിന്നല്ല ശമ്പളം ലഭിക്കുന്നത് എന്ന് ഓര്‍ക്കണം. ഈ ഗൂഢാലോചനയ്ക്കും അക്രമത്തിനും നേതൃത്വം നല്‍കിയ മുഴുവന്‍ പൊലീസുകാരെതിരെയും കഠിന നടപടി സ്വീകരിക്കണം, വി.ഡി. സതീശന്‍ ആവശ്യപ്പെട്ടു.

അതേസമയം, പേരാമ്പ്രയില്‍ എംപിയെ മര്‍ദിച്ചതിനെതിരെ പ്രതിഷേധിച്ച കോണ്‍ഗ്രസ് പ്രവര്‍ത്തകരെതിരെ പൊലീസ് കേസെടുത്തു.