കുവൈറ്റ് ബാങ്ക് തട്ടിപ്പ്: അന്വേഷണം ക്രൈംബ്രാഞ്ചിന്

കോട്ടയം: കുവൈറ്റ് ബാങ്ക് തട്ടിപ്പ് കേസ് ക്രൈം ബ്രാഞ്ചിനു കൈമാറും. കൂടുതല്‍ കേസുകള്‍ വരാനുള്ള സാധ്യത കണക്കിലെടുത്താണ് ക്രൈംബ്രാഞ്ച് അന്വേഷണം. കൂടാതെ എല്ലാ കേസുകളിലും 20 ലക്ഷം രൂപയ്ക്ക് മുകളിലാണ് തട്ടിപ്പ് നടന്നിരിക്കുന്നത്.  കോട്ടയത്ത് എട്ടും എറണാകുളത്ത് നാല് കേസുകളുമാണ് രജിസ്ട്രര്‍ ചെയ്തത്. കുവൈറ്റ് അല്‍ അഹ് ലി ബാങ്കാണ് പരാതിക്കാര്‍.

കുവൈറ്റിലെ അല്‍ അഹ് ലി ബാങ്കില്‍ നിന്നും 60 ലക്ഷം മുതല്‍ ഒന്നര കോടി രൂപ വരെ ലോണെടുത്ത ശേഷം മുങ്ങിയതായാണ് കേസ്. പ്രതികളായ മലയാളികള്‍ ഭൂരിഭാഗവും മറ്റു രാജ്യങ്ങലേക്ക് കുടിയേറിയതായാണ് പൊലീസ് നിഗമനം. അതിനാല്‍ തട്ടിപ്പ് കേസ് പ്രതികള്‍ക്കെതിരെ പൊലീസ് ലുക്കൗട്ട് നോട്ടീസ് പുറപ്പെടുവിക്കും. 73.17 ലക്ഷം, 86.45 ലക്ഷം, 61.90 ലക്ഷം എന്നീ രൂപയുടെ തട്ടിപ്പ് പ്രതികള്‍ നടത്തിയതായാണ് എഫ്ഐആര്‍. എറണാകുളം, മൂവാറ്റുപുഴ , കോതമംഗലം എന്നിവിടങ്ങളിലും കേസ് രജിസ്റ്റര്‍ ചെയ്തിട്ടുണ്ട്. സാമ്പത്തിക തട്ടിപ്പ്, വഞ്ചന, ഗൂഢാലോചന എന്നീ വകുപ്പുകള്‍ പ്രകാരമാണ് കേസെടുത്തിരിക്കുന്നത്.

കോട്ടയം ജില്ലയിലാണ് കൂടുതല്‍ കേസുകള്‍. എട്ടുകേസുകളിലായി ആകെ ഏഴരക്കോടി രൂപയുടെ തട്ടിപ്പ് കേസുകള്‍ രജിസ്റ്റര്‍ ചെയ്തിരിക്കുന്നത്. വൈക്കത്ത് 86.65 ലക്ഷം രൂപയുടെ തട്ടിപ്പില്‍ പടിഞ്ഞാറേനട സ്വദേശി ജിഷയാണ് പ്രതി. കീഴൂര്‍ സ്വദേശി റോബി മാത്യുവിനെയാണ് വെള്ളൂര്‍ പൊലീസ് രജിസ്റ്റര്‍ ചെയ്ത 61 ലക്ഷം രൂപയുടെ തട്ടിപ്പ് കേസില്‍ പ്രതി ചേര്‍ത്തിരിക്കുന്നത്. ഏറ്റവും കൂടിയ തുകയുടെ തട്ടിപ്പ് തലയോലപ്പറമ്പ് പൊലീസ് സ്റ്റേഷനില്‍ രജിസ്ട്രര്‍ ചെയ്ത 1.20 കോടിയുടെതാണ്. പ്രിയദര്‍ശന്‍ എന്ന വ്യക്തിക്കെതിരെയാണ് കേസ്.

അയര്‍കുന്നം - 81 ലക്ഷം, കടുത്തുരുത്തിയില്‍ 80 ലക്ഷത്തിന്റെ തട്ടിപ്പിനും കേസെടുത്തു. കൊങ്ങാണ്ടൂര്‍ ടോണി പൂവേലിയില്‍, കടുത്തുരുത്തി സ്വദേശി റെജിമോന്‍ എന്നിവരാണ് പ്രതികള്‍. ഉഴവൂര്‍ സ്വദേശികളായ സിജോ മോന്‍ ഫിലിപ്പ്, ജോജോ മാത്യു, സുമിത മേരി എന്നിവര്‍ക്കെതിരെയാണ് കുറവിലങ്ങാട് പൊലീസിന്റെ കേസുകള്‍.