ആഗോള അയ്യപ്പസംഗമത്തില്‍ പങ്കെടുക്കില്ലെന്ന് കേന്ദ്രമന്ത്രി സുരേഷ് ഗോപി

അലപ്പുഴ:  ആഗോള അയ്യപ്പസംഗമത്തില്‍ പങ്കെടുക്കില്ലെന്ന് കേന്ദ്രമന്ത്രി സുരേഷ് ഗോപി വ്യക്തമാക്കി. സംഗമത്തിലേക്ക് ക്ഷണിച്ചോ എന്ന ചോദ്യത്തിന് ദേവസ്വം ബോര്‍ഡ് പ്രസിഡന്റ് മറുപടി നല്‍കേണ്ട കാര്യമാണെന്നും ഇത്രയും കാലം എന്തുകൊണ്ട് പറഞ്ഞില്ലെന്നും അദ്ദേഹം ചോദിച്ചു.

തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് പി.എസ്. പ്രശാന്ത് നേരിട്ട് സുരേഷ് ഗോപിയുടെ വസതിയിലെത്തിയാണ് കഴിഞ്ഞ ദിവസം സംഗമത്തിലേക്ക് ക്ഷണം നല്‍കിയത്. എന്നിരുന്നാലും, പരിപാടിക്ക് രാഷ്ട്രീയ ലക്ഷ്യമുണ്ടെന്ന സംഘപരിവാര്‍ നിലപാടിനെ തുടര്‍ന്ന് ബിജെപി നേതൃത്വവും സുരേഷ് ഗോപിയും സംഗമത്തില്‍ പങ്കെടുക്കാതിരിക്കാനാണ് തീരുമാനിച്ചത്.

അതേസമയം, രാഷ്ട്രീയ വിവാദങ്ങള്‍ക്കിടെ സംഗമത്തിന്റെ ഒരുക്കങ്ങള്‍ പുരോഗമിച്ചുകൊണ്ടിരിക്കുന്നു. എഡിഎം ഡോ. അരുണ്‍ എസ്. നായര്‍ക്കാണ് ഏകോപന ചുമതല. എഡിജിപി എസ്. ശ്രീജിത്തിന്റെ നേതൃത്വത്തില്‍ സുരക്ഷാ സംവിധാനവും ശക്തിപ്പെടുത്തിയിട്ടുണ്ട്.

പമ്പാ തീരത്ത് സെപ്റ്റംബര്‍ 20നാണ് ആഗോള അയ്യപ്പസംഗമം നടക്കുന്നത്. ദക്ഷിണേന്ത്യയിലെ ഏറ്റവും വലിയ ഭക്തജന സംഗമമായി കരുതപ്പെടുന്ന ഈ മഹാസംഗമം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. കര്‍ണാടക, തെലങ്കാന മന്ത്രിമാരും കേരളത്തിലെ കേന്ദ്ര മന്ത്രിമാരും അടക്കം പങ്കെടുക്കുമെന്നാണ് വിവരം.