നവീന്‍ ബാബുവിന്റെ മരണം; കുറ്റപത്രം റദ്ദാക്കണമെന്നാവശ്യപ്പെട്ട് പിപി ദിവ്യ ഹൈക്കോടതിയെ സമീപിക്കും

കണ്ണൂര്‍: എഡിഎം കെ. നവീന്‍ ബാബുവിന്റെ ദുരൂഹമരണവുമായി ബന്ധപ്പെട്ട കേസില്‍ കുറ്റപത്രം റദ്ദാക്കണമെന്നാവശ്യപ്പെട്ട് കണ്ണൂര്‍ ജില്ലാ പഞ്ചായത്ത് മുന്‍ പ്രസിഡന്റ് പി.പി. ദിവ്യ ഹൈക്കോടതിയെ സമീപിക്കും. കുറ്റപത്രം റദ്ദാക്കണമെന്നാവശ്യപ്പെട്ട് ഹരജി നല്‍കുന്നതായി ദിവ്യയുടെ അഭിഭാഷകന്‍ അഡ്വ. കെ. വിശ്വന്‍ വ്യക്തമാക്കി.

പി.പി. ദിവ്യയ്ക്കെതിരായ കുറ്റാരോപണങ്ങള്‍ നിയമപരമായി നിലനില്‍ക്കില്ലെന്ന് ദിവ്യയുടെ അഭിഭാഷകന്‍ അഡ്വ. കെ. വിശ്വന്‍ വ്യക്തമാക്കി. നവീന്‍ ബാബു കൈക്കൂലി വാങ്ങിയെന്നതിന് മതിയായ തെളിവുകള്‍ ഉണ്ടെന്നും  അദ്ദേഹം വ്യക്തമാക്കി.

കുറ്റപത്രത്തില്‍, നവീന്‍ ബാബുവിന്റെ ആത്മഹത്യക്ക് പി.പി. ദിവ്യയാണ് ഉത്തരവാദിയെന്ന് പറയുന്നുണ്ട്. യാത്രയയപ്പിനിടെ ദിവ്യ നടത്തിയ പ്രസംഗമാണ് ആത്മഹത്യയ്ക്ക് പ്രേരണയായി  ചൂണ്ടിക്കാട്ടുന്നത്. എന്നാല്‍ പരിപാടിയിലേക്ക് ദിവ്യയെ ക്ഷണിച്ചിരുന്നില്ലെന്ന് കളക്ട്രേറ്റ് ജീവനക്കാര്‍ മൊഴി നല്‍കിയിട്ടുണ്ട്.

കൈക്കൂലി നല്‍കിയതായി നേരിട്ടുള്ള തെളിവുകളൊന്നുമില്ലെന്നും, ഫയലില്‍ അനാവശ്യമായ കാലതാമസം ഉണ്ടായിട്ടില്ലെന്നും പ്രത്യേക അന്വേഷണ സംഘം കണ്ടെത്തിയിട്ടുണ്ട്. 

പരിപാടിക്ക് മുന്‍പും ശേഷവും കളക്ടറുമായുള്ള ദിവ്യയുടെ ടെലിഫോണ്‍ സംഭാഷണങ്ങള്‍, അതുപോലെ തന്നെ നവീന്‍ ബാബു ആത്മഹത്യ ചെയ്തതിന് ശേഷം നടന്ന വിളികളും മൊഴിയിലുണ്ട്.