തിരുവനന്തപുരം മെഡിക്കല്‍ കോളേജിലെ ഉപകരണ ക്ഷാമം: അന്വേഷിക്കാന്‍ നാലംഗ സമിതി

തിരുവനന്തപുരം മെഡിക്കല്‍ കോളേജിലെ ഉപകരണ ക്ഷാമവുമായി ബന്ധപ്പെട്ട്  യൂറോളജി വിഭാഗം മേധാവി ഡോ. ഹാരിസ് ചിറക്കല്‍ നടത്തിയ വെളിപ്പെടുത്തലില്‍ അന്വേഷണം നടത്താന്‍ തീരുമാനം. മെഡിക്കല്‍ വിദ്യാഭ്യാസ ഡയറക്ടറുടെ ശിപാര്‍ശ പ്രകാരം നാല് അംഗ സമിതിയെയാണ് നിയമിച്ചിരിക്കുന്നത്. 

തിരഞ്ഞെടുക്കപ്പെട്ട സമിതിയില്‍ തിരുവനന്തപുരം മെഡിക്കല്‍ കോളജ് പ്രിന്‍സിപ്പലും കോട്ടയം മെഡിക്കല്‍ കോളജ് സൂപ്രണ്ടും ഉള്‍പ്പെടുന്നു. ഇവര്‍ക്ക് പരാതികളും ആരോപണങ്ങളും പരിശോധിച്ച് വിശദമായ റിപ്പോര്‍ട്ട് സമര്‍പ്പിക്കാനാണ് ചുമതല. ഇതിനായി ആരോഗ്യമന്ത്രാലയം ഉടന്‍ ഔദ്യോഗിക ഉത്തരവ് പുറത്തിറക്കാനാണ് സാധ്യത. 

ഡോ. ഹാരിസ് നേരത്തെ നടത്തിയ വെളിപ്പെടുത്തലില്‍, ഏകദേശം ഒരു വര്‍ഷം മുന്‍പേ തന്നെ ഉപകരണ ക്ഷാമം സംബന്ധിച്ച വിവരങ്ങള്‍ ആരോഗ്യമന്ത്രി ഉള്‍പ്പെടെയുള്ള ഉന്നത ഉദ്യോഗസ്ഥരെ അറിയിച്ചിരുന്നുവെന്ന് പറഞ്ഞിരുന്നു. എല്ലാ വിഭാഗങ്ങളിലും ഇത്തരമൊരു അവസ്ഥയുണ്ടെങ്കിലും പലരും ഭയത്തിന്റെ പേരിലാണ് അതിനെ തുറന്ന് പറയാന്‍ മടിക്കുന്നതെന്ന് അദ്ദേഹം ആരോപിച്ചു.

ആദ്യഘട്ടത്തില്‍ ഭയമുണ്ടായിരുന്നു. പക്ഷേ രോഗികളോടുള്ള ഉത്തരവാദിത്വം ഓര്‍ത്തപ്പോള്‍ ആ ഭയത്തിന് അര്‍ഥമില്ലെന്ന് മനസിലായി എന്ന് ഡോ. ഹാരിസ് വ്യക്തമാക്കി.