ലഹരി പാര്‍ട്ടി നടത്തി പെണ്‍കുട്ടികളെ ലൈംഗിക ചൂഷണത്തിനിരയാക്കി; റിമയ്ക്കും ആഷിഖിനുമെതിരെ ഗുരുത ആരോപണം; പോലീസ് പ്രാഥമിക അന്വേഷണം ആരംഭിച്ചു

കൊച്ചി: ഇടത് സഹയാത്രികരും സിനിമ ദമ്പതികളുമായ നടി റിമ കല്ലിങ്കല്‍, സംവിധായകന്‍ ആഷിഖ് അബു എന്നിവര്‍ക്കെതിരെ പ്രാഥമിക അന്വേഷണത്തിന് ഉത്തരവ്. ലഹരി പാര്‍ട്ടി നടത്തുന്നുവെന്ന ആരോപണത്തില്‍ കൊച്ചി സിറ്റി പോലീസ് കമ്മിഷണര്‍ക്ക് യുവമോര്‍ച്ച നല്‍കിയ പരാതിയിലാണ് നടപടി.

എക്കാലത്തും സിപിഎമ്മിനൊപ്പം നിന്ന താരദമ്പതികളാണ് റിമയും അഷിഖും. എന്നാല്‍ ഹേമ കമ്മിറ്റി റിപ്പോര്‍ട്ട് വൈകിച്ചത് സംബന്ധിച്ച് രൂക്ഷ വിമര്‍ശനമാണ് അഷിഖ് സര്‍ക്കാരിനെതിരെ ഉന്നയിച്ചത്. ഇത് ഇടത് കേന്ദ്രങ്ങളില്‍ വരെ ഞെട്ടലുണ്ടാക്കി.

സിപിഎം സഹയാത്രികരില്‍ നിന്ന് പോലും ഉയര്‍ന്ന വിമര്‍ശനം സര്‍ക്കാരിന്റെ പ്രതിച്ഛായ കൂടുതല്‍ മോശമാക്കുകയും ചെയ്തു. ഇതിനിടെയാണ് താരദമ്പതികള്‍ക്കെതിരെ അന്വേഷണം ആരംഭിച്ചത്. എറണാകുളം സൗത്ത് എസ്പിക്കാണ് അന്വേഷണച്ചുമതല.

നേരത്തെ തമിഴ് ഗായിക സുചിത്രയാണ് റിമയ്ക്കും ആഷിഖിനുമെതിരെ ഗുരുതര ആരോപണമുന്നയിച്ചത്. റിമയും ആഷിഖും നടത്തുന്ന പാര്‍ട്ടികളില്‍ ഒരിക്കലും ഉപയോഗിക്കാന്‍ പാടില്ലാത്ത ലഹരി വസ്തുക്കള്‍ ഉപയോഗിച്ചതായി സുചിത്ര ഒരു ചാനല്‍ അഭിമുഖത്തില്‍ പറഞ്ഞിരുന്നു.

അവരുടെ പാര്‍ട്ടികളില്‍ നല്‍കുന്ന ചോക്ലേറ്റ് പോലും കഴിക്കാതിരിക്കാതിരിക്കാന്‍ ശ്രദ്ധിച്ചിരുന്നതായി ഒരു സുഹൃത്ത് തന്നോടു പറഞ്ഞിരുന്നെന്നും സുചിത്ര ആരോപിച്ചു. കൊച്ചിയിലെ ഫ്‌ളാറ്റില്‍ ലഹരിപാര്‍ട്ടി നടത്തി പെണ്‍കുട്ടികളെ ലൈംഗിക ചൂഷണത്തിനിരയാക്കിയെന്നുമാണ് സുചിത്രയുടെ ആരോപണം. സുചിത്രയ്‌ക്കെതിരെ റിമ വക്കീല്‍ നോട്ടിസ് അയച്ചിട്ടുണ്ട്.