റഷ്യക്ക് ചൈനയുടെ താക്കീത്; ഉക്രെയ്‌നില്‍ ആണവായുധ യുദ്ധത്തിനു തുനിയരുത്: തങ്ങള്‍ക്കെതിരെ പാശ്ചാത്യ ശക്തികള്‍ ഒന്നിക്കുന്നുവെന്ന് റഷ്യ

ബെയ്ജിംഗ്; ഒരു ഇടവേളയ്ക്ക് ശേഷം ഉക്രെയ്ന്‍-റഷ്യന്‍ യുദ്ധം ശക്തമാകുന്നതിനിടെ റഷ്യയ്ക്ക് താക്കീതുമായി ചൈന. ഉക്രെയ്‌നില്‍ ആണവായുധ യുദ്ധത്തിനു തുനിയരുതെന്നാണ് ചൈനീസ് വിദേശകാര്യ മന്ത്രാലം നല്‍കിയ ഉപദേശം. ആണവായുധ രാജ്യങ്ങളുടെ സംയുക്ത സമിതി എടുത്ത തീരുമാനം വിസ്മരിക്കരുതെന്നും ചൈന റഷ്യയെ ഓര്‍മപ്പെടുത്തി. ഇക്കാര്യം ചൈനീസ് വിദേശകാര്യ മന്ത്രാലയത്തിന്റെ വക്താവ് മാവോ നിംഗ് ബീജിംഗിലെ വാര്‍ത്താ സമ്മേളനത്തില്‍ വ്യക്തമാക്കുകയും ചെയ്തു.

അമേരിക്കയുള്‍പ്പടെയുള്ള പാശ്ചാത്യ രാജ്യങ്ങള്‍ ഉക്രെയ്‌ന് കൂടുതല്‍ പിന്തുണ നല്‍കുന്ന സാഹചര്യത്തില്‍ റഷ്യയുടെ ആണവ നയം മാറ്റുമെന്ന് റഷ്യയുടെ വിദേശകാര്യ സഹമന്ത്രി കഴിഞ്ഞ ദിവസം പറഞ്ഞിരുന്നു. തങ്ങള്‍ക്കുനേരെ കൂടുതല്‍ പാശ്ചാത്യരായ ശത്രുക്കളെത്തുന്നുവെന്ന് വിശദീകരിച്ചാണ് ആണവ നയങ്ങളില്‍ മാറ്റം വരുത്തിയേക്കുമെന്ന് റഷ്യയുടെ ഡെപ്യൂട്ടി വിദേശകാര്യമന്ത്രി സെര്‍ജി റിയാബ്കോവിന്റ് സൂചന നല്‍കിയത്.

രാജ്യത്തിനുനേരെ ആണവാക്രമണം ഉണ്ടാകുകയോ രാജ്യത്തിന്റെ നിലനില്‍പ്പിനാകെ ഭീഷണിയാകുന്ന ഒരു വലിയ ആക്രമണം ഉണ്ടാകുമ്പോഴേ ആണയാവുധം പ്രയോഗിക്കൂ എന്നാണ് റഷ്യയുടെ 2020ലെ ആണവനയം. ഇതില്‍ ഭേദഗതി വരുമെന്നാണ് റഷ്യന്‍ വിദേശകാര്യമന്ത്രാലയം സൂചിപ്പിക്കുന്നത്.

2022 ജനുവരി 3 ന് ആണവയുദ്ധം തടയുന്നത് സംബന്ധിച്ച് അഞ്ച് ആണവായുധ രാജ്യങ്ങളായ ചൈന, ഫ്രാന്‍സ്, റഷ്യ, ബ്രിട്ടണ്‍, അമേരിക്ക എന്നിവര്‍ സംയുക്ത പ്രസ്താവന പുറപ്പെടുവിച്ചിരുന്നതായി ചൈന റഷ്യയെ ഓര്‍മിപ്പിച്ചു. പരമാവധി സംയമനം പാലിക്കാനും ആണവ ആക്രമണങ്ങള്‍ ഒഴിവാക്കാനും റഷ്യ തയാറാകണമെന്നും ചൈന നിര്‍ദേശിച്ചു.