കായംകുളത്ത് തെരുവ് നായയുടെ ആക്രമണത്തില്‍ നാല് പേര്‍ക്ക് ഗുരുതര പരിക്ക്; സംസ്ഥാനത്ത് തെരുവുനായ ആക്രമണം തുടര്‍ക്കഥയാകുന്നു

കായംകുളത്ത് തെരുവ് നായയുടെ ആക്രമത്തില്‍ നാല് പേര്‍ക്ക് ഗുരുതര പരിക്കേറ്റു. ഇന്ന് രാവിലെ കായംകുളം വള്ളിക്കുന്നത്താണ് സംഭവം നടന്നത്. പടയണിവെട്ടം പുതുപ്പുരയ്ക്കല്‍ തോന്തോലില്‍ ഗംഗാധരന്‍(50), സഹോദരന്‍ രാമചന്ദ്രന്‍ (55), പുതുപ്പുരയ്ക്കല്‍ കിഴക്കതില്‍ ഹരികുമാര്‍, പള്ളിമുക്ക് പടീറ്റതില്‍ മറിയാമ്മ രാജന്‍ (70) എന്നിവരാണ് തെരുവ് നായയുടെ ആക്രമണത്തിന് ഇരയായത്. 

രണ്ടുപേര്‍ക്ക് മുഖത്ത് പരിക്കേറ്റതായാണ് ലഭിക്കുന്ന വിവരം. ഗംഗാധരന്‍, മറിയാമ്മ എന്നിവര്‍ക്കാണ് മുഖത്ത് പരിക്കേറ്റത്. ഇവരുടെ മുഖവും മൂക്കും നായ കടിച്ചു പറിച്ചു. ഹരികുമാറിന് വയറിനും രാമചന്ദ്രന്റെ കാലിനുമാണ് കടിയേറ്റത്.

നായയുടെ കടിയേറ്റ ഗംഗാധരന്‍ ബഹളം വെച്ചതോടെയാണ് രാമചന്ദ്രന്‍ ഇയാളെ രക്ഷിക്കാനായി സംഭവസ്ഥലത്തേക്ക് എത്തിയത്. അപ്പോഴാണ് രാമചന്ദ്രനും തെരുവ് നായയുടെ ആക്രമണത്തിന് ഇരയായത്. ഒരു കുട്ടിയെ നായയില്‍ നിന്നും രക്ഷിക്കാന്‍ ശ്രമിക്കുന്നതിനിടയിലാണ് മറിയാമ്മയെ നായ ആക്രമിച്ചത്. മറിയാമ്മയുടെ ബന്ധുവും അയല്‍വാസികൂടിയായ കുട്ടിയെ നായ കടിക്കാന്‍ ഓടിച്ചപ്പോള്‍ മറിയാമ്മ രക്ഷപ്പെടുത്താന്‍ ശ്രമിക്കുകയായിരുന്നു.

ഗുരുതരമായി പരിക്കേറ്റ ഗംഗാധരന്‍, രാമചന്ദ്രന്‍ എന്നിവര്‍ ആലപ്പുഴ മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. മറിയാമ്മ പരുമലയിലിലെ സ്വകാര്യ ആശുപത്രിയിലും ഹരികുമാര്‍ കായംകുളം താലൂക്ക് ആശുപത്രിയിലുമാണ് ചികിത്സ നേടിയിരിക്കുന്നത്.