ചൈനയുടെ ഡീപ്‌സീക്കിന് സമാനമായ ഇന്ത്യയുടെ എ.ഐ പ്ലാറ്റ്‌ഫോം ഉടന്‍: എ.ഐയില്‍ അമേരിക്കയുടെ കുത്തക അവസാനിക്കുന്നു; ചാറ്റ് ജിപിടിക്കും തിരിച്ചടിയാകും

ന്യൂഡല്‍ഹി: അമേരിക്കയ്ക്കും ചൈനയ്ക്കും പിന്നാലെ ഇന്ത്യയും എ.ഐ അധിഷ്ടിത ജനറ്റിക് പ്രോഗ്രാമിംഗിലേക്കു ചുവടുവയ്ക്കുന്നു. ചൈനയുടെ ഡീപ്‌സീക്കിന് സമാനമായ എഐ പ്ലാറ്റ്‌ഫോം വികസിപ്പിച്ചുവരികെയാണെന്ന് കേന്ദ്ര ഐ.ടി മന്ത്രി അശ്വിനി വൈഷ്ണവ് വെളിപ്പെടുത്തി. ഇന്ത്യ സ്വന്തമായി ലാര്‍ജ് ലാംഗ്വേജ് മോഡല്‍ (എല്‍.എല്‍.എം) വികസിപ്പിക്കുന്നതോടെ നിര്‍മ്മിത ബുദ്ധി (എ.ഐ) മേഖലയില്‍ വലിയ മുന്നേറ്റമാകും രാജ്യത്തുണ്ടാകുകയെന്നും അദ്ദേഹം ആത്മവിശ്വാസം പ്രകടിപ്പിച്ചു.

കുറഞ്ഞ ചിലവില്‍ എഐ പ്ലാറ്റ്‌ഫോം വികസിപ്പിച്ചെടുക്കാന്‍ കഴിയുമെന്നതാണ് അമേരക്കയ്ക്ക് വലിയ തിരിച്ചടിയാകുന്നത്. കഴിഞ്ഞ ദിവസം ചൈന ഇത്തരത്തില്‍ കുറഞ്ഞ ചിലവില്‍ ഡീപ്‌സീക്ക് എന്ന എഐ ജിപിടി വികസിപ്പിച്ച് ലോകത്തെ ഞെട്ടിച്ചിരുന്നു. ഇന്ത്യയും ഈ മേഖലയിലേക്ക് ചുവടുവയ്ക്കുന്നതോടെ എ.ഐ രംഗത്തെ അമേരിക്കയുടെ കുത്തക തകരും. മാത്രമല്ല എ.ഐ സാങ്കേതിക വിദ്യയിലെ വലിയ ചിലവും ഗണ്യമായി കുറയ്ക്കുവാനും കഴിയും.

ഇന്ത്യയുടെ എ.ഐ. എല്‍.എല്‍.എം പുറത്തുവരാന്‍ പത്ത് മാസമാണ് പറഞ്ഞിരിക്കുന്നത്. ഒന്നര വര്‍ഷമായി രാജ്യത്തിന്റെ ഐടി ഗവേഷകര്‍ ഇതിനു പിന്നാലെയാണ്. ഇന്ത്യയുടെ സാംസ്‌കാരികവും ഭാഷാപരവുമായ വൈവിധ്യങ്ങളെ കൈകാര്യം ചെയ്യാനുതകുന്ന തരത്തിലാണ് ഈ മോഡല്‍ വിഭാവനം ചെയ്തിരിക്കുന്നത്. എ.ഐ മേഖലയിലെ സ്വയംപര്യാപ്തത എന്ന ലക്ഷ്യത്തിലേക്കുള്ള യാത്രയില്‍ വലിയൊരു നാഴികക്കല്ലാകും ഇതെന്നും കേന്ദ്ര മന്ത്രി കൂട്ടിച്ചേര്‍ത്തു.

അമേരിക്കയെ ഞെട്ടിച്ചുകൊണ്ടാണ് എ.ഐ അധിഷ്ഠിത ആപ്ലിക്കേഷനായ ഡീപ്സീക് കഴിഞ്ഞ ദിവസം ചൈന അവതരിപ്പിച്ചത്. വെറും രണ്ട് മാസംകൊണ്ട് വികസിപ്പിച്ചെടുത്ത ആപ്ലിക്കേഷന്‍ രണ്ട് ദിവസത്തിനുള്ളില്‍ തന്നെ അമേരിക്കയുടെ ചാറ്റ് ജിപിടിയേയും മൈക്രോസോഫ്റ്റിന്റെ ജെമിനയുമൊക്കെ പിന്നിലാക്കി. എ.ഐയില്‍ യുഎസ് നിലനിര്‍ത്തിയിരുന്ന ആധിപത്യമാണ് ഇതോടെ ചൈനീസ് ചാറ്റ് ബോട്ട് തകര്‍ത്തിരിക്കുന്നത്.

പ്ലേ സ്റ്റോറിലും ആപ്പില്‍ സ്റ്റോറിലുമെല്ലാം ടോപ്റേറ്റഡ് ആപ്പായി ഡീപ്സീക് മാറി കഴിഞ്ഞു. പരിധിയില്ലാതെ സൗജന്യമായി ഉപയോഗിക്കാമെന്നതാണ് ആളുകളെ കുടുതലായി ഇതിലേക്ക് ആകര്‍ഷിക്കുന്ന പ്രധാന കാര്യം. മാത്രമല്ല മറ്റ് എ.ഐ ആപ്ലിക്കേഷനുകളേക്കാള്‍ കാര്യക്ഷമതയോടെ പ്രതികരിക്കുന്നു എന്നതും ഡീപ്സീക്കിന്റെ മികവായി സാങ്കേതിക ലോകം വിലയിരുത്തുന്നു.

ചാറ്റ് ജിപിടിയുടെ വികസിപ്പിച്ചെടുക്കാന്‍ അമേരിക്ക നൂറു മില്യന്‍ ഡോളര്‍ ചിലവഴിച്ചപ്പോള്‍ ഡീപ്സീക്കിന് ചൈന ചിലവഴിച്ചത് വെറും അഞ്ച് മില്യന്‍ ഡോളറാണ്. ഡീപ്‌സീക്കിന്റെ വരവോടെ എന്‍വിഡിയ, മെറ്റാ, മൈക്രോസോഫ്റ്റ് കമ്പനികളുടെയെല്ലാം ഓഹരികള്‍ കുത്തനെ ഇടിഞ്ഞു. സിലിക്കണ്‍വാലിയടക്കം അമേരിക്കയുടെ വിവരസാങ്കേതിക മേഖല ഇതോടെ കടുത്ത ആശങ്കയിലുമായി.