നടിയുടെ പരാതിയില്‍ ബോബി ചെമ്മണ്ണൂരിനെ കസ്റ്റഡിയിലെടുത്തു; അറസ്റ്റ് ഉണ്ടായേക്കുമെന്ന് സൂചന: മാസങ്ങള്‍ക്ക് ശേഷമുള്ള പരാതിക്ക് പിന്നില്‍ പ്രതിഫലവുമായി ബന്ധപ്പെട്ട തര്‍ക്കമോ?

കല്‍പ്പറ്റ: ജൂല്ലറി ഉദ്ഘാടനത്തിനിടെ ലൈംഗീക ചുവയോടെ ദ്വയാര്‍ത്ഥ പ്രയോഗത്തിലൂടെ അവഹേളിച്ചെന്ന് കാട്ടി നടി നല്‍കിയ പരാതിയില്‍ വ്യവസായി ബോബി ചെമ്മണ്ണൂരിനെ പോലീസ് കസ്റ്റഡിയിലെടുത്തു. വയനാട്ടിലെ ബോബി ചെമ്മണ്ണൂരിന്റെ റിസോര്‍ട്ടില്‍ നിന്ന് എറണാകുളം സെന്‍ട്രല്‍ പോലീസാണ് ബോച്ചെയേ കസ്റ്റഡിയിലെടുത്തത്. പ്രാഥമിഘട്ട ചോദ്യം ചെയ്യലാണ് നടക്കുന്നത്. അറസ്റ്റ് ഉണ്ടായേക്കുമെന്നും സൂചനയുണ്ട്.

സ്ത്രീകള്‍ക്കുനേരേ അശ്ലീലപരാമര്‍ശം നടത്തുക, അത്തരം പരാമര്‍ശങ്ങള്‍ സാമൂഹികമാധ്യമങ്ങളിലൂടെ പ്രചരിപ്പിക്കല്‍ എന്നീ കുറ്റകൃത്യങ്ങള്‍ ചുമത്തിയാണ് ബോബി ചെമ്മണ്ണൂരിനെതിരെ എറണാകുളം സെന്‍ട്രല്‍ പോലീസ് കേസ് രജിസ്റ്റര്‍ ചെയ്തിരിക്കുന്നത്. ജാമ്യമില്ലാ വകുപ്പുകളാണ് ബോബി ചെമ്മണ്ണൂരിനെതിരെ ചുമത്തിയിരിക്കുന്നത്. അറസ്റ്റുണ്ടായാല്‍ റിമാന്‍ഡിലേക്ക് പോകാനാണ് സാധ്യത. ജയിലിലെ എക്‌സ്പീരിയന്‍സ് നേരിട്ടറിയുന്നതിനായി ഒരിക്കല്‍ ജയിലില്‍ കഴിയണമെന്ന് മുന്‍പ് ആഗ്രഹം പ്രകടിപ്പിച്ച വ്യക്തിയാണ് ബോച്ചെ.  

അതേസമയം, ബോബി ചെമ്മണ്ണൂരിനെ കസ്റ്റഡിയിലെടുത്ത പോലീസ് നടപടിയില്‍ വലിയ ആശ്വാസമാണ് തോന്നുന്നതെന്ന് പരാതിക്കാരിയായ നടി പറഞ്ഞു. സംരക്ഷണം നല്‍കുന്ന സര്‍ക്കാരും പോലീസ് ഡിപ്പാര്‍ട്ടുമെന്റുമുള്ള സംസ്ഥാനത്താണ് ജീവിക്കുന്നതെന്ന ഉറച്ച ബോധ്യം തനിക്കുണ്ട്. അതുകൊണ്ടുതന്നെയാണ് ഈ പോരാട്ടത്തിന് ഇറങ്ങിത്തിരിച്ചത്. ഞാന്‍ അനുഭവിച്ച സൈബര്‍ ബുള്ളിയിങ് അത്ര വലുതാണ്. ആവര്‍ത്തിക്കരുതെന്ന് പലതവണ പറഞ്ഞിട്ടും തുടര്‍ന്നു. അത് പണത്തിന്റെ ഹുങ്കായും വെല്ലുവിളിയായും മാത്രമേ കാണാന്‍ കഴിയൂ. എല്ലാത്തിനും ഒരു അവസാനം വേണം. അതുകൊണ്ടാണ് പോരാട്ടത്തിന് ഇറങ്ങാമെന്ന് തീരുമാനിച്ചതെന്നും പരാതിക്കാരി പറഞ്ഞു.

നാല് മാസങ്ങള്‍ക്കുമുന്‍പ് ബോബി ചെമ്മണ്ണൂരിന്റെ ജൂല്ലറി ഷോപ്പിന്റെ ഉദ്ഘാടന വേദിയിലാണ് നടിയെ ദ്വയാര്‍ത്ഥ പ്രയോഗത്തിലൂടെ ബോച്ചെ വിശേഷിപ്പിച്ചത്. ഇത് പിന്നീട് സമൂഹമാധ്യമങ്ങളില്‍ വൈറലായി. അന്ന് പ്രതികരിക്കാതിരുന്ന നടി നാല് മാസങ്ങള്‍ക്ക് ശേഷമാണ് ഇത് സംബന്ധിച്ച് പരാതി നല്‍കി.

രണ്ട് ഷോപ്പുകളുടെ ഉദ്ഘാടനങ്ങള്‍ക്ക് നടി വന്നിരുന്നുവെന്ന് ബോബി ചെമ്മണൂര്‍ പറഞ്ഞു. ആഭരണങ്ങള്‍ ധരിച്ച് മോഡലിങ്ങൊക്കെ ചെയ്ത് അവര്‍ നൃത്തം ചെയ്തിരുന്നു. പോസിറ്റീവായി ഞാനൊരു പരാമര്‍ശം നടത്തി. കുറേപ്പേര്‍ അത് ദ്വയാര്‍ഥത്തില്‍ ഉപയോഗിച്ചു. അവര്‍ക്കത് ഡാമേജായി, വിഷമമായി. അതില്‍ എനിക്കും വിഷമമുണ്ട്. ഞാന്‍ മനപ്പൂര്‍വം ഒരാളോടും ഇങ്ങനെയൊന്നും ചെയ്യില്ല. തമാശയ്ക്ക് എന്തെങ്കിലുമൊക്കെ പറയും. മാര്‍ക്കറ്റിങ്ങിന്റെ ഭാഗമായിട്ടായിരുന്നു അതെല്ലാമെന്നും ബോബി പറഞ്ഞിരുന്നു. അതേസമയം നടിയും ബോച്ചയും തമ്മില്‍ പ്രതിഫലവുമായി ബന്ധപ്പെട്ട തര്‍ക്കമാണ് ഇപ്പോള്‍ പരാതി നല്‍കാന്‍ ഇടയാക്കിയതെന്നാണ് സംസാരം.