കെഎസ്ആര്‍ടിസിയില്‍ സ്ത്രീകള്‍ക്ക് സൗജന്യ യാത്ര നടപ്പാക്കണം; മഹിളാമോര്‍ച്ചയുടെ പ്രതിഷേധം

തിരുവനന്തപുരം: കെഎസ്ആര്‍ടിസി ബസുകളില്‍ സ്ത്രീകള്‍ക്ക് സൗജന്യ യാത്ര അനുവദിക്കണമെന്ന ആവശ്യവുമായി മഹിളാമോര്‍ച്ച പ്രവര്‍ത്തകര്‍ സംസ്ഥാനത്തിന്റെ വിവിധ ഭാഗങ്ങളില്‍ പ്രതിഷേധവുമായി രംഗത്തെത്തി. കാസര്‍ഗോഡ്, കോഴിക്കോട്, തിരുവനന്തപുരം എന്നിവിടങ്ങളിലാണ് ശക്തമായ പ്രതിഷേധം നടന്നത്.

പ്രതിഷേധത്തിന്റെ ഭാഗമായി പ്രവര്‍ത്തകര്‍ ടിക്കറ്റ് എടുക്കാതെ കെഎസ്ആര്‍ടിസി ബസുകളില്‍ യാത്ര ചെയ്തു. കാസര്‍ഗോഡില്‍ മഹിളാമോര്‍ച്ച പ്രവര്‍ത്തകര്‍ കയറിയ ബസ് നിര്‍ത്തിയിടുകയും, ബസ് പുറപ്പെടുന്നത് തടയുകയും ചെയ്തു. ബസ് പുറപ്പെടുന്നതുവരെ പ്രതിഷേധം തുടരുമെന്ന നിലപാടിലാണ് പ്രവര്‍ത്തകര്‍ നിന്നത്.

അതേസമയം, അനുമതിയില്ലാതെ ബസ് സര്‍വീസ് നടത്താനാകില്ലെന്ന് ബസ് ജീവനക്കാര്‍ വ്യക്തമാക്കിയതോടെ സ്ഥിതി സംഘര്‍ഷാവസ്ഥയിലേക്ക് നീങ്ങി. തുടര്‍ന്ന് പൊലീസ് ഇടപെട്ട് പ്രതിഷേധക്കാരെ അറസ്റ്റ് ചെയ്ത് നീക്കി.

സംസ്ഥാനത്തുടനീളം ഇത്തരത്തില്‍ ടിക്കറ്റ് എടുക്കാതെ ബസുകളില്‍ കയറി പ്രതിഷേധം സംഘടിപ്പിക്കുകയായിരുന്നു മഹിളാമോര്‍ച്ച.