കോണ്‍ഗ്രസില്‍ തര്‍ക്കം തുടരുന്നു; നിജേഷ് അരവിന്ദ് രാജിവച്ചു

നിയമസഭാ തിരഞ്ഞെടുപ്പ് കഴിഞ്ഞിട്ടും കോണ്‍ഗ്രസിനുള്ളിലെ സീറ്റ് തര്‍ക്കവുമായി ബന്ധപ്പെട്ട വിവാദങ്ങള്‍ ശമിക്കുന്നില്ല. കോഴിക്കോട് ഡിസിസി ജനറല്‍ സെക്രട്ടറി നിജേഷ് അരവിന്ദ് രാജിവെച്ചത് പാര്‍ട്ടിയെ പ്രതിസന്ധിയിലാക്കി. രാജിക്കത്ത് കെപിസിസിക്ക് കൈമാറിയതായി അദ്ദേഹം അറിയിച്ചു.

ബേപ്പൂര്‍, എലത്തൂര്‍ ഉള്‍പ്പെടെയുള്ള ചില മണ്ഡലങ്ങളില്‍ സ്ഥാനാര്‍ഥിയായി നിജേഷിനെ പരിഗണിക്കുന്നുവെന്ന റിപ്പോര്‍ട്ടുകള്‍ മുന്‍പ് പുറത്തുവന്നിരുന്നു. എന്നാല്‍ സ്ഥാനാര്‍ഥി പട്ടിക പ്രസിദ്ധീകരിക്കപ്പെട്ടപ്പോള്‍ അതില്‍ നിജേഷിന്റെ പേര് ഉള്‍പ്പെട്ടിരുന്നില്ല.

തുടര്‍ന്ന് ബാലുശ്ശേരി മണ്ഡലത്തിന്റെ പ്രചാരണ ചുമതല നല്‍കാമെന്നായിരുന്നു പാര്‍ട്ടി നേതൃത്വത്തിന്റെ ഉറപ്പ്. എന്നാല്‍ അവിടെയും പ്രതീക്ഷിച്ചതുപോലെ ചുമതല ലഭിക്കാത്തത് അദ്ദേഹത്തില്‍ അസന്തോഷം വളര്‍ത്തി. ഈ സാഹചര്യങ്ങളാണ് രാജിയിലേക്ക് നയിച്ചതെന്നാണ് സൂചന.

ഇതിനിടെ, മറ്റേതെങ്കിലും പാര്‍ട്ടിയിലേക്കു പോകാന്‍ താന്‍ ഉദ്ദേശിക്കുന്നില്ലെന്നും കോണ്‍ഗ്രസുകാരനായി തന്നെ തുടരണമെന്നും നിജേഷ് അരവിന്ദ് വ്യക്തമാക്കി. ഇന്നലെയാണ് രാജിക്കത്ത് കെപിസിസിക്ക് കൈമാറിയത്.