മാസപ്പടി കേസ്: ഡല്‍ഹി ഹൈക്കോടതിയില്‍ ഇന്ന് മുതല്‍ അന്തിമവാദം ആരംഭിക്കും

സിഎംആര്‍എല്‍-എക്സാലോജിക് മാസപ്പടി കേസുമായി ബന്ധപ്പെട്ട ഹര്‍ജികളില്‍ ഡല്‍ഹി ഹൈക്കോടതിയില്‍ നിര്‍ണായകമായ അന്തിമവാദം ഇന്ന്  ആരംഭിക്കും. ജസ്റ്റിസ് നീന ബന്‍സാല്‍ കൃഷ്ണയുടെ ബെഞ്ചാണ് ഹര്‍ജികള്‍ പരിഗണിക്കുന്നത്.

എസ്.എഫ്.ഐ.ഒ (SFIO) അന്വേഷണത്തെ ചോദ്യം ചെയ്ത് സിഎംആര്‍എല്‍ നല്‍കിയ ഹര്‍ജികളിലാണ് കോടതി അന്തിമവാദം കേള്‍ക്കുന്നത്. നേരത്തെ കഴിഞ്ഞ ഒക്ടോബറില്‍ കേസ് പരിഗണിച്ചപ്പോള്‍ എസ്.എഫ്.ഐ.ഒയ്ക്കോ കേന്ദ്ര സര്‍ക്കാരിനോ വേണ്ടി അഭിഭാഷകര്‍ ഹാജരാകാതിരുന്നതിനെത്തുടര്‍ന്ന് വാദം ഇന്നത്തേക്ക് മാറ്റിവെക്കുകയായിരുന്നു.

നേരത്തെ ഈ കേസ് പരിഗണിച്ചിരുന്ന ബെഞ്ചുകളില്‍ നിന്ന് മാറ്റിയ ശേഷമാണ് ഇപ്പോള്‍ ജസ്റ്റിസ് നീന ബന്‍സാല്‍ കൃഷ്ണയുടെ മുന്‍പാകെ എത്തുന്നത്. എസ്.എഫ്.ഐ.ഒ അന്വേഷണം സ്റ്റേ ചെയ്യണമെന്ന സിഎംആര്‍എല്ലിന്റെ ആവശ്യം കോടതി മുന്‍പ് അംഗീകരിച്ചിരുന്നില്ല. അന്വേഷണ റിപ്പോര്‍ട്ട് സമര്‍പ്പിക്കുന്നതുമായി ബന്ധപ്പെട്ട് കേന്ദ്രം നല്‍കിയ വാക്കാലുള്ള ഉറപ്പുകള്‍ ലംഘിക്കപ്പെട്ടതായും നേരത്തെ ആക്ഷേപം ഉയര്‍ന്നിരുന്നു.