ശബരിമല സ്വര്‍ണക്കൊള്ള കേസ്: എസ്ഐടിയെ കുറ്റപ്പെടുത്തി യുഡിഎഫ് അവസരവാദ നിലപാട് സ്വീകരിക്കുന്നതായി എം വി ഗോവിന്ദന്‍

ശബരിമല സ്വര്‍ണക്കൊള്ള കേസിലെ അന്വേഷണവുമായി ബന്ധപ്പെട്ട് എസ്ഐടിയില്‍ വിശ്വാസമില്ലെന്ന കോണ്‍ഗ്രസ് നേതാക്കളുടെ നിലപാടിനെ വിമര്‍ശിച്ച് സിപിഐഎം സംസ്ഥാന സെക്രട്ടറി എം വി ഗോവിന്ദന്‍ രംഗത്തെത്തി. അന്വേഷണം കോണ്‍ഗ്രസ് നേതാക്കളായ അടൂര്‍ പ്രകാശ് ഉള്‍പ്പെടെയുള്ളവരിലേക്കു നീങ്ങിയതോടെ, യുഡിഎഫ് അവസരവാദപരമായ സമീപനം സ്വീകരിച്ച് എസ്ഐടിയെ കുറ്റപ്പെടുത്തുകയാണെന്ന് അദ്ദേഹം ആരോപിച്ചു.

ഇന്നലെ വരെ അന്വേഷണം സിപിഐഎമ്മിനെതിരെയാകുമെന്ന പ്രചാരണം നടത്തി സന്തോഷം പ്രകടിപ്പിച്ചിരുന്ന വിഡി സതീശനും കെ സി വേണുഗോപാലും ഉള്‍പ്പെടെയുള്ള യുഡിഎഫ് നേതാക്കള്‍, ഈ വാര്‍ത്ത പുറത്തുവന്ന നിമിഷം മുതല്‍ നിലപാട് മാറ്റുകയാണെന്നും എം വി ഗോവിന്ദന്‍ പറഞ്ഞു. അന്നുവരെ എസ്ഐടിയെ അംഗീകരിച്ചിരുന്ന ഇവര്‍, അന്വേഷണം കോണ്‍ഗ്രസ് ഐ നേതാക്കളിലേക്കു തിരിഞ്ഞതോടെ ഇപ്പോള്‍ എസ്ഐടിയില്‍ വിശ്വാസമില്ലെന്ന നിലപാടിലേക്കാണ് എത്തിയതെന്ന് അദ്ദേഹം ചൂണ്ടിക്കാട്ടി.

അന്വേഷണം കോണ്‍ഗ്രസ് നേതാക്കളായ അടൂര്‍ പ്രകാശ് ഉള്‍പ്പെടെയുള്ളവരിലേക്കു നീങ്ങുന്നതായി കണ്ടതോടെ, അതിനെ പ്രതിരോധിക്കാന്‍ വേണ്ടിയാണ് സ്വര്‍ണക്കൊള്ള കേസ് ഫലപ്രദമായി അന്വേഷിക്കുന്നതില്‍ നിന്ന് എസ്ഐടിയെ തടയാന്‍ ബോധപൂര്‍വമായ ഇടപെടലുകള്‍ നടത്തുന്നതെന്നും എം വി ഗോവിന്ദന്‍ ആരോപിച്ചു. ഇത്തരം ഇടപെടലുകള്‍ കേരളം അംഗീകരിക്കില്ലെന്നും, ഇതെല്ലാം ജനങ്ങള്‍ക്കു വ്യക്തമായി അറിയാമെന്നും അദ്ദേഹം പറഞ്ഞു.