സിപിഐ കൊല്ലം സമ്മേളനത്തില്‍ പാര്‍ട്ടി നേതൃത്വത്തിനെതിരെ കനത്ത വിമര്‍ശനം

കൊല്ലം: സിപിഐ കൊല്ലം ജില്ലാ സമ്മേളനളനത്തില്‍ പാര്‍ട്ടി നേതൃത്വത്തിനെതിരെ വിമര്‍ശനം. സംസ്ഥാന സെക്രട്ടറി ബിനോയ് വിശ്വവും പാര്‍ട്ടി നേതൃത്വവും സിപിഎമ്മിനും മുഖ്യമന്ത്രി പിണറായി വിജയനു മുന്നില്‍ അനാവശ്യമായി മുട്ടിടിച്ചു നില്‍ക്കുന്നുവെന്ന് പ്രതിനിധികള്‍ ആരോപിച്ചു. 

പിണറായി വിജയന്റെ ഏകാധിപത്യ ഭരണം തുടരുകയാണ്. എം വി ഗോവിന്ദനും ബിനോയ് വിശ്വവും സംസാരിക്കുന്ന ഭാഷ ജനങ്ങള്‍ക്ക് മനസ്സിലാവുന്നില്ല. നേതാക്കള്‍ പൊതുജന സമ്പര്‍ക്കത്തില്‍ കൂടുതല്‍ ശ്രദ്ധിക്കണം, എന്നും പ്രതിനിധികള്‍ പറഞ്ഞു. 

ബിനോയ് വിശ്വം ബ്രൂവറി വിഷയത്തില്‍ പോലും വ്യക്തമായ നിലപാട് സ്വീകരിച്ചില്ലെന്നും, മുന്‍ നേതാക്കളായിരുന്ന വെളിയം ഭാര്‍ഗവനും സി കെ ചന്ദ്രപ്പനും നേതൃത്വം വഹിച്ചിരുന്നകാലത്ത്  പാര്‍ട്ടിക്ക് ഉണ്ടായിരുന്ന വ്യക്തിത്വം ഇല്ലാതായി എന്നും അംഗങ്ങള്‍ കുറ്റപ്പെടുത്തി.

പാര്‍ട്ടിയുടെ മന്ത്രിമാര്‍ പരാജയപ്പെട്ടുവെന്നും സിവില്‍ സപ്ലൈസും കൃഷിവകുപ്പും ഉള്‍പ്പെടെയുള്ള വകുപ്പുകള്‍ പരാജയമാണെന്നും ചര്‍ച്ചയില്‍ അഭിപ്രായങ്ങള്‍ ഉയര്‍ന്നു വന്നു.