പുഴുക്കുത്തുകളെ നിങ്ങള്‍ക്ക് അറിയുമോ? എങ്കില്‍ വിവരം പങ്കുവയ്ക്കു... വാട്‌സ്ആപ്പ് നമ്പര്‍ പുറത്തുവിട്ട് അന്‍വര്‍

മലപ്പുറം: പോലീസിന്റെ ക്രിമിനലിസത്തില്‍ ഇരകളായവര്‍ക്ക് പരാതി അറിയിക്കാന്‍ പി.വി. അന്‍വര്‍ വാട്‌സാപ് നമ്പര്‍ പുറത്തുവിട്ടു. 8304855901 എന്ന നമ്പറിലൂടെ ഇത്തരം ക്രൂരതകള്‍ ജനങ്ങള്‍ക്ക് അറിയിക്കാമെന്ന് അന്‍വര്‍ പറഞ്ഞു. പുഴുക്കുത്തുകളെ തേടിയുള്ള യാത്രയിലാണ് താന്‍. പോലീസില്‍ നിന്ന് ആര്‍ക്കെങ്കിലും തിക്താനുഭവങ്ങള്‍ ഉണ്ടായിട്ടുണ്ടെങ്കില്‍ ആ വിവരം പങ്കുവയ്ക്കാമെന്ന് അറിയിച്ചാണ് അന്‍വര്‍ വാട്‌സ് ആപ്പ് നമ്പര്‍ പുറത്തുവിട്ടത്.

പോലീസിലെ ക്രിമിനല്‍സുമായി ബന്ധപ്പെട്ട് പീഡിപ്പിക്കപ്പെട്ടവര്‍, കുറ്റവാളികളാക്കപ്പെട്ടവര്‍, കള്ളക്കേസില്‍ കുടുക്കപ്പെട്ടവര്‍, ഇല്ലാത്ത എം.ഡി.എം.എ. കേസുണ്ടാക്കി  ജയിലിലടക്കപ്പെട്ടവര്‍ തുടങ്ങി പോലീസിന്റെ അതിക്രമങ്ങളുടെ അനുഭവകഥകളുമായി ഒരുപാട് കോള്‍ വരുന്നുണ്ട്. അതുകൊണ്ട് വാട്‌സാപ്പ് പോയിന്റ് തുടങ്ങുകയാണെന്നും അദ്ദേഹം പറഞ്ഞു.

മുഖ്യമന്ത്രി സൂചിപ്പിച്ച പുഴുക്കുത്തുകളെ തേടിയുള്ള യാത്രയിലാണ് ഞാനും കേരളത്തിലെ സഖാക്കളും, ഒറ്റയ്ക്കല്ല. ഒരുപാടാളുകള്‍ തേടിവരുന്നുണ്ട്. സംസ്ഥാനത്ത് എല്ലായിടത്തും സഖാക്കള്‍ ഇത്തരത്തില്‍ ബന്ധപ്പെടുന്നുണ്ടെന്നും പി.വി. അന്‍വര്‍ പറഞ്ഞു. മൊഴിയെടുക്കാന്‍ വരുന്ന ഐ.ജിയുടെ മുമ്പില്‍ എല്ലാം തെളിവും നല്‍കുമെന്നും അദ്ദേഹം കൂട്ടിച്ചേര്‍ത്തു.

എ.ഡി.ജി.പി. എം.ആര്‍. അജിത് കുമാറിനെതിരെയും പത്തനംതിട്ട മുന്‍ എസ്.പി. സുജിത് ദാസിനെതിരെയും വീണ്ടും ഗുരുതര ആരോപണങ്ങളാണ് പി.വി. അന്‍വര്‍ ഉന്നയിച്ചത്. സ്വര്‍ണ്ണക്കള്ളക്കടത്തിലും കൊലപാതകക്കേസിലുമടക്കം ഇരുവര്‍ക്കും പങ്കുണ്ടെന്നാണ് പി.വി. അന്‍വര്‍ ആരോപിച്ചു.

നേരത്തെ പൊതുയിടത്തില്‍ താന്‍ പറഞ്ഞ കാര്യങ്ങള്‍ ചൂണ്ടിക്കാട്ടി മുഖ്യമന്ത്രിക്കും പാര്‍ട്ടി സെക്രട്ടറിക്കും കൃത്യമായി പരാതി നല്‍കിയിരുന്നുവെന്നും അതിന്റെ അടിസ്ഥാനത്തില്‍ മുഖ്യമന്ത്രിയുടെ നിര്‍ദേശപ്രകാരം ഡി.ജി.പിയുടെ നേതൃത്വത്തില്‍ അന്വേഷണം ആരംഭിച്ചതായും പി.വി. അന്‍വര്‍ പറഞ്ഞു. അന്വേഷണം ആരംഭിച്ച് ദിവസങ്ങള്‍ക്കകം സുജിത് ദാസ് ഐ.പി.എസിനെ സസ്‌പെന്‍ഡ് ചെയ്തതായും അന്‍വര്‍ പറഞ്ഞു.

മുഖ്യമന്ത്രിക്കും പാര്‍ട്ടി സെക്രട്ടറിക്കും നല്‍കിയ പരാതിയില്‍ പി.ശശിയുടെ പേര് ഉള്‍പ്പെടുത്തിയിട്ടില്ല. മുഖ്യമന്ത്രിക്കും പാര്‍ട്ടി സെക്രട്ടറിക്കും നല്‍കിയത് ഒരേ പരാതിയാണെന്നും എം.വി. ഗോവിന്ദന്‍ പറഞ്ഞതാണ് വാസ്തവമെന്നും പിവി അന്‍വര്‍ പറഞ്ഞു. പാര്‍ട്ടിയെ സംബന്ധിച്ച് പരസ്യമായി പരാതി ഉന്നയിച്ചത് പാര്‍ട്ടി സിസ്റ്റത്തിനെതിരാണ്. അത് ഗോവിന്ദന്‍ മാഷ് പറഞ്ഞത് ശരിയാണെന്നും എന്നാല്‍ താന്‍ പൊതുപ്രവര്‍ത്തകനെന്ന നിലയിലാണ് ആരോപണം ഉന്നയിച്ചതെന്നും പി.വി. അന്‍വര്‍ പറഞ്ഞു.