രാജ്യത്ത് രണ്ട് തരം പൗരന്മാര്‍ ഇല്ലാതാകുന്നു: ഏക സിവില്‍കോഡ് നാളെ മുതല്‍; നിയമം നടപ്പാക്കുന്ന ആദ്യ സംസ്ഥാനമാകാന്‍ ഉത്തരാഖണ്ഡ്

ന്യൂഡല്‍ഹി: ഏറെ കോളിളക്കം സൃഷ്ടിച്ച ഏക സിവില്‍ കോഡ് നാളെ രാജ്യത്തിന് നിലവില്‍ വരും. ഉത്തരാഖണ്ഡിലാണ് ആദ്യം നിയമം നടപ്പാക്കുക. സംസ്ഥാന മുഖ്യമന്ത്രി പുഷ്‌കര്‍ സിംഗ് ധാമി നിയമം നടപ്പിലാക്കുന്നതിന്റെയും യൂണിഫോം സിവില്‍ കോഡ് (യു.സി.സി) പോര്‍ട്ടലിന്റെയും ഉദ്ഘാനം നാളെ നിര്‍വഹിക്കും. ഇതോടെ രാജ്യത്ത് യു.സി.സി നടപ്പാക്കുന്ന ആദ്യ സംസ്ഥാനമാകും ഉത്തരാഖണ്ഡ്.

നേരത്തെ ഇത് സംബന്ധിച്ച വിജ്ഞാപനം സംസ്ഥാന സര്‍ക്കാര്‍ ഇറക്കിയിരുന്നു. വിവാഹം, വിവാഹമോചനം, സ്വത്തവകാശം, പിന്തുടര്‍ച്ചാവകാശം മുതലായവയില്‍ സംസ്ഥാനത്തെ എല്ലാവര്‍ക്കും ഏകീകൃത നിയമം കൊണ്ടുവരുന്ന നിയമമാണ് യു.സി.സി. മതവിശ്വാസങ്ങളെയും രീതികളെയും അമര്‍ച്ച ചെയ്യുന്ന നിയമമാണിതെന്ന് കാട്ടി പ്രതിപക്ഷം അടക്കം ശക്തമായ എതിര്‍പ്പ് ഒരുഘട്ടത്തില്‍ ഉയര്‍ത്തിയിരുന്നു. എന്നാല്‍ കേന്ദ്ര സര്‍ക്കാര്‍ വിട്ടുവീഴ്ചയില്ലാത്ത നിലപാട് സ്വീകരിച്ചതാണ് നിയമം നടപ്പാക്കുന്നതിലേക്ക് കാര്യങ്ങള്‍ എത്തിച്ചത്. ആദിവാസി വിഭാഗക്കാരെ നിയമത്തിന്റെ പരിധിയില്‍ നിന്നും ഒഴിവാക്കിയിട്ടുണ്ട്.

നാളെ മുതല്‍ ഉത്തരാഖണ്ഡ് സംസ്ഥാനത്തിന്റെ മുഴുവന്‍ പ്രദേശത്തിനും നിയമം ബാധകമാണ്. കൂടാതെ ഉത്തരാഖണ്ഡിന് പുറത്ത് താമസിക്കുന്ന സംസ്ഥാനത്തെ നിവാസികള്‍ക്കും ഇത് ബാധകമാണ്. ഭരണഘടനയുടെ ആര്‍ട്ടിക്കിള്‍ 342, ആര്‍ട്ടിക്കിള്‍ 366 (25) എന്നിവ പ്രകാരം വിജ്ഞാപനം ചെയ്ത പട്ടികവര്‍ഗ വിഭാഗങ്ങള്‍ക്ക് (എസ്ടി) ഈ നിയമം ബാധകമല്ല, കൂടാതെ തതകാം ഭാഗത്തിന് കീഴിലുള്ള സംരക്ഷിത അധികാര-ശാക്തീകരണ വ്യക്തികളെയും സമൂഹങ്ങളെയും അതിന്റെ പരിധിയില്‍ നിന്ന് ഒഴിവാക്കിയിട്ടുണ്ട്.

രാജ്യത്തിന്റെ നിയമങ്ങള്‍ക്ക് വിധേയമായേ ഇനി വിവാഹം നടത്താനാകു. പുരുഷന് 21 വയസും സ്ത്രീക്ക് 18 വയസും തികഞ്ഞിരിക്കണം.  മതപരമായ ആചാരങ്ങള്‍ അല്ലെങ്കില്‍ നിയമ വ്യവസ്ഥകള്‍ പ്രകാരം ഏത് രൂപത്തിലും വിവാഹ ചടങ്ങുകള്‍ നടത്താം. എന്നാല്‍ വിവാഹങ്ങള്‍ 60 ദിവസത്തിനുള്ളില്‍ രജിസ്റ്റര്‍ ചെയ്യണം. രജിസ്‌ട്രേഷന്‍ അപേക്ഷ നിരസിച്ചാല്‍ അപ്പീല്‍ നല്‍കാം. രജിസ്ട്രേഷന് തെറ്റായ വിവരങ്ങള്‍ നല്‍കിയാല്‍ പിഴ ഈടാക്കാനും വ്യവസ്ഥയുണ്ട്.