കര്‍ണാടകയില്‍ കോണ്‍ഗ്രസിന്റെ വിജയശില്പി ഭരണതലപ്പത്തേക്ക്: ഡി.കെ ശിവകുമാര്‍ മുഖ്യമന്ത്രിയായേക്കും; അധികാര കൈമാറ്റം ഈ വര്‍ഷം അവസാനം

ബംഗളുരു: കര്‍ണാടകയില്‍ ശക്തമായ തിരിച്ചുവരവിലൂടെ കോണ്‍ഗ്രസിനെ അധികാരത്തിലെത്തിക്കാന്‍ നിര്‍ണായക പങ്കുവഹിച്ച പി.സി.സി പ്രസിഡന്റും ഉപമുഖ്യമന്ത്രിയുമായ ഡി.കെ ശിവകുമാര്‍ ഭരണതലപ്പത്തേക്ക്. മുഖ്യമന്ത്രി പദം ശിവകുമാറിന് കൈമാറുമെന്ന സൂചന നല്‍കിയിരിക്കുകയാണ് മുഖ്യമന്ത്രി സിദ്ധരാമയ്യ. മുന്‍ ധാരണ പ്രകാരമാണ് മുഖമന്ത്രി പദം വച്ചുവച്ചുമാറുന്നതെന്നാണ് സൂചന. അധികാരം കൈമാറാന്‍ മടിച്ചുനിന്ന സിദ്ധരാമയ്യ ഹൈക്കമാന്‍ഡിനെ ഇടപെടലിനെ തുടര്‍ന്നാണ് മുഖ്യമന്ത്രി സ്ഥാനത്ത് നിന്ന് ഒഴിയാന്‍ തയാറായത്.

2018 ല്‍ 80 സീറ്റിലേക്ക് കൂപ്പുകുത്തിയ കോണ്‍ഗ്രസിനെ 135 സീറ്റിന്റെ പിന്‍ബലത്തോടെ 2023 ല്‍ അധികാരത്തിലേറ്റിയതിന് പിന്നില്‍ ശിവകുമാറായിരുന്നു. സംസ്ഥാന കോണ്‍ഗ്രസ് അധ്യക്ഷനായ ശിവകുമാറാണ് അന്ന് തിരഞ്ഞെടുപ്പിനെ നയിച്ചതും. വിജയത്തിന് പിന്നാലെ ശിവകുമാറും സിദ്ധരാമയ്യയും മുഖ്യമന്ത്രി സ്ഥാനത്തിനായി അവകാശവാദം ഉന്നയിച്ചിരുന്നു. പിന്നീട് ഹൈക്കമാന്‍ഡ് ഇടപെട്ട് ഡി.കെയെ അനുനയിപ്പിക്കുകയായിരുന്നു.

രണ്ടര വര്‍ഷം വീതം മുഖ്യമന്ത്രി പദവിയെന്ന ധാരണയിലാണ് സിദ്ധരാമയ്യ അധികാരത്തിലേറിയതെന്നായിരുന്നു അന്ന് പുറത്തു വന്ന റിപ്പോര്‍ട്ടുകള്‍. എന്നാല്‍ ഇത്തരത്തിലൊരു ധാരണ ഉണ്ടായിരുന്നില്ലെന്നാണ് സിദ്ധരാമയ്യ പിന്നീട് പറഞ്ഞത്. അധികാര കൈമാറ്റം സംബന്ധിച്ച് കോണ്‍ഗ്രസ് നേതൃത്വവുമായി ധാരണയുണ്ടെന്നും തന്റെ അവസരത്തിനായി കാത്തിരിക്കുകയാണെന്നും ഒരു ടെലിവിഷന്‍ ചാനലിന് നല്‍കിയ അഭിമുഖത്തില്‍ ശിവകുമാര്‍ പറഞ്ഞിരുന്നു.

ഇത് വലിയ ചര്‍ച്ചയായതോടെ തിരുത്തലുമായി ശിവകുമാര്‍ രംഗത്തെത്തി. ഇക്കാര്യത്തില്‍ തീരുമാനമെടുക്കുന്നത് താനല്ലെന്നും സിദ്ധരാമയ്യയുടെ വാക്ക് അന്തിമമായിരിക്കുമെന്നും ശിവകുമാര്‍ തിരുത്തി. എന്നാല്‍ മുഖ്യമന്ത്രി കസേരയ്ക്കായി അണിയറയില്‍ ശിവകുമാര്‍ ശക്തമായ ഇടപെടല്‍ നടത്തുന്നുണ്ടായിരുന്നു. ഒടുവില്‍ വിഷയം ഹൈക്കമാന്‍ഡിന്റെ മുന്നിലുമെത്തി. ഇതിനു പിന്നാലെയാണ് ഡി.കെ ശിവകുമാറിന് ഈ വര്‍ഷം അവസാനം അധികാരം കൈമാറുമെന്ന് സിദ്ധരാമയ്യ സൂചന നല്‍കിയത്. ഹൈക്കമാന്റും വിഷയത്തില്‍ അന്തിമ തീരുമാനമെടുക്കുക.