എല്‍ഡിഎഫ് വീണ്ടും അധികാരത്തില്‍ വരും: കെ.എന്‍. ബാലഗോപാല്‍

തിരുവനന്തപുരം: എല്‍ഡിഎഫ് വീണ്ടും അധികാരത്തില്‍ എത്തുമെന്ന കാര്യത്തില്‍ തനിക്ക് ഉറച്ച വിശ്വാസമുണ്ടെന്ന് ധനകാര്യ വകുപ്പ് മന്ത്രി കെ. എന്‍. ബാലഗോപാല്‍ പറഞ്ഞു. ജനങ്ങളില്‍ നിന്ന് ലഭിക്കുന്ന പ്രതികരണങ്ങള്‍ ഇതിന് അനുകൂലമാണെന്നും, സര്‍ക്കാര്‍ ചെയ്യാനായ എല്ലാ വികസന-ക്ഷേമ പ്രവര്‍ത്തനങ്ങളും നടപ്പാക്കിയിട്ടുണ്ടെന്നും അദ്ദേഹം വ്യക്തമാക്കി.

കോണ്‍ഗ്രസ് ഭരിക്കുന്ന സംസ്ഥാനങ്ങളില്‍ ശമ്പളവിതരണം പോലും പ്രതിസന്ധിയിലാണെന്നും, പെന്‍ഷന്‍ ആനുകൂല്യങ്ങള്‍ നല്‍കുന്നതിലും വീഴ്ചയുണ്ടെന്നും ബാലഗോപാല്‍ ആരോപിച്ചു. കോണ്‍ഗ്രസിന്റെ ഗ്യാരണ്ടി വാഗ്ദാനങ്ങള്‍ ജനങ്ങള്‍ വിശ്വസിക്കില്ലെന്നും, തെലങ്കാനയില്‍ പ്രഖ്യാപിച്ച വാഗ്ദാനങ്ങള്‍ പോലും നടപ്പാക്കിയിട്ടില്ലെന്നും അദ്ദേഹം വിമര്‍ശിച്ചു.

കേരളത്തില്‍ തന്നെ ക്ഷേമപെന്‍ഷന്‍ കൃത്യമായി നല്‍കാന്‍ കഴിയാത്ത കോണ്‍ഗ്രസിനെ ജനങ്ങള്‍ വിശ്വസിക്കില്ലെന്നാണ് തന്റെ വിലയിരുത്തല്‍. എല്‍ഡിഎഫിനൊപ്പം ജനങ്ങളോട് ചേര്‍ന്ന് പ്രവര്‍ത്തിക്കുന്ന സാമൂഹിക പ്രവര്‍ത്തകരാണ് ഉള്ളതെന്നും അദ്ദേഹം കൂട്ടിച്ചേര്‍ത്തു.

കോണ്‍ഗ്രസ് നേതാക്കള്‍ ഫ്‌ലക്‌സ് ബോര്‍ഡുകളും പോസ്റ്ററുകളും സ്ഥാപിക്കുന്നത് ആത്മവിശ്വാസം കൊണ്ടുമാത്രമല്ല, ആളുകളെ കൂട്ടുപിടിക്കാനുള്ള ശ്രമത്തിന്റെ ഭാഗമായാണെന്നും ബാലഗോപാല്‍ പറഞ്ഞു. നടന്ന തിരഞ്ഞെടുപ്പ് പഞ്ചായത്ത് അടിസ്ഥാനത്തിലുള്ള വോട്ടെടുപ്പല്ലെന്നും അദ്ദേഹം കൂട്ടിച്ചേര്‍ത്തു.