നിതിന്‍ രാജിന്റെ മരണം: സംഗീത നമ്പ്യാരെ അറസ്റ്റ് ചെയ്ത് ജാമ്യത്തില്‍ വിട്ടു; ഡോ.റാം ഇപ്പോഴും ഒളിവില്‍

കണ്ണൂര്‍:  അഞ്ചരക്കണ്ടി ദന്തല്‍ കോളജ് വിദ്യാര്‍ത്ഥി നിതിന്‍ രാജിന്റെ മരണവുമായി ബന്ധപ്പെട്ട കേസില്‍ നിര്‍ണ്ണായക നീക്കങ്ങള്‍. കേസിലെ പ്രതിയും കോളജ് ജീവനക്കാരിയുമായ സംഗീത നമ്പ്യാരെ പോലീസ് അറസ്റ്റ് ചെയ്ത് ജാമ്യത്തില്‍ വിട്ടു. തലശ്ശേരി അഡീഷണല്‍ സെഷന്‍സ് കോടതി മുന്‍കൂര്‍ ജാമ്യം അനുവദിച്ചതിനെത്തുടര്‍ന്ന് അന്വേഷണ ഉദ്യോഗസ്ഥന് മുന്നില്‍ ഹാജരായ ഇവരുടെ മൊഴി രേഖപ്പെടുത്തിയ ശേഷമാണ് വിട്ടയച്ചത്.

അതേസമയം, ഒന്നാം പ്രതി ഡോ. എം.കെ. റാം ഇപ്പോഴും ഒളിവിലാണ്. മുന്‍കൂര്‍ ജാമ്യാപേക്ഷ കോടതി തള്ളിയിട്ടും ഇയാളെ പിടികൂടാന്‍ പോലീസിന് സാധിക്കാത്തത് വലിയ പ്രതിഷേധത്തിന് കാരണമായിട്ടുണ്ട്. പ്രതികള്‍ക്ക് രക്ഷപ്പെടാന്‍ പോലീസ് പഴുതൊരുക്കുകയാണെന്ന് നിതിന്‍ രാജിന്റെ കുടുംബം ആരോപിച്ചു. ഇയാള്‍ മുന്‍കൂര്‍ ജാമ്യത്തിനായി ഹൈക്കോടതിയെ സമീപിക്കുമെന്നും സൂചനയുണ്ട്.

നിതിന്‍ രാജിന് നീതി തേടി ദളിത് സംഘടനകള്‍ ഇന്ന് നടത്തിയ സംസ്ഥാന ഹര്‍ത്താല്‍ ജനജീവിതത്തെ സാരമായി ബാധിച്ചു. സംസ്ഥാനത്തിന്റെ വിവിധ ഭാഗങ്ങളില്‍ സംഘര്‍ഷാവസ്ഥ നിലനിന്നു. കടകമ്പോളങ്ങളും ബാങ്കുകളും മാളുകളും പ്രതിഷേധക്കാര്‍ ബലമായി അടപ്പിച്ചു. കൊല്ലം ചവറയില്‍ എസ്എസ്എല്‍സി വാല്യുവേഷന്‍ ഡ്യൂട്ടിക്ക് പോയ അധ്യാപകരുടെ വാഹനം തടഞ്ഞതും, തിരുവല്ലയില്‍ ക്യാന്‍സര്‍ രോഗിയുമായി പോയ കാര്‍ തടഞ്ഞതും വലിയ പ്രതിഷേധത്തിനിടയാക്കി. വിഐടി എന്‍ട്രന്‍സ് പരീക്ഷ എഴുതാന്‍ പോകാനിരുന്ന വിദ്യാര്‍ത്ഥികളും ഹര്‍ത്താല്‍ മൂലം വലഞ്ഞു. വരും തലമുറയ്ക്ക് വേണ്ടിയുള്ള പോരാട്ടമാണിതെന്നും ഹര്‍ത്താല്‍ പരാജയപ്പെടുത്താന്‍ ആസൂത്രിത നീക്കം നടക്കുന്നുണ്ടെന്നും ആക്ഷന്‍ കൗണ്‍സില്‍ ആരോപിച്ചു.