നെടുങ്കണ്ടം ഇരട്ടക്കൊലപാതകം: പ്രതി സജി പിടിയില്‍

ഇടുക്കി നെടുങ്കണ്ടം ഇരട്ടക്കൊലപാതക കേസില്‍ പ്രതിയെന്ന് സംശയിക്കുന്ന സജിയെ പൊലീസ് പിടികൂടി. വീടിന് സമീപമുള്ള പറമ്പില്‍ നിന്നാണ് ഇയാളെ അതിസാഹസികമായി അറസ്റ്റ് ചെയ്തത്. ഒളിവില്‍ പോയ സജിക്കായി പൊലീസ് നാല് സംഘങ്ങളായി തിരിഞ്ഞ് വ്യാപകമായ തിരച്ചില്‍ നടത്തിയിരുന്നു. പൊലീസ് നായയുടെയും ഡ്രോണിന്റെയും സഹായത്തോടെയാണ് അന്വേഷണം മുന്നോട്ട് പോയത്.

കഴിഞ്ഞ രണ്ട് ദിവസമായി വീടിന് സമീപത്തെ പറമ്പിലെ വലിയ പാറയുടെ ഇടുക്കില്‍ ഒളിച്ചിരിക്കുകയായിരുന്നുവെന്ന് സജി പൊലീസിനോട് വെളിപ്പെടുത്തി. ഡ്രോണ്‍ ഉപയോഗിച്ചുള്ള തിരച്ചില്‍ ശക്തമാകുമ്പോള്‍ അവിടെ നിന്ന് രക്ഷപ്പെടാന്‍ ശ്രമിക്കുന്നതിനിടയിലാണ് ഇയാള്‍ പൊലീസിന്റെ വലയിലായത്. പിടികൂടുമ്പോള്‍ സജി അവശനിലയിലായിരുന്നുവെന്ന് പൊലീസ് അറിയിച്ചു. തുടര്‍ന്ന് മെഡിക്കല്‍ പരിശോധനകള്‍ക്കായി ഇയാളെ ആശുപത്രിയിലെത്തിച്ചു.

അതേസമയം, നെടുങ്കണ്ടത്ത് വീട്ടുവളപ്പില്‍ നിന്ന് കണ്ടെത്തിയ മൃതദേഹങ്ങള്‍ മേരിക്കുട്ടിയുടെയും മകന്‍ റെജിയുടെയും തന്നെയാണെന്ന് ബന്ധുക്കള്‍ സ്ഥിരീകരിച്ചു. കൂടുതല്‍ ശാസ്ത്രീയ പരിശോധനകള്‍ക്കായി ഡി.എന്‍.എ സാമ്പിളുകള്‍ ശേഖരിച്ചിരിക്കുകയാണ്. മൃതദേഹങ്ങള്‍ കണ്ടെത്തുമ്പോള്‍ ഉണ്ടായിരുന്ന വസ്ത്രങ്ങള്‍ തിരിച്ചറിയാന്‍ സഹായിച്ചതായി ബന്ധുക്കള്‍ വ്യക്തമാക്കി. പോസ്റ്റ്മോര്‍ട്ടം നടപടികള്‍ പൂര്‍ത്തിയാക്കിയ ശേഷം മൃതദേഹങ്ങള്‍ ബന്ധുക്കള്‍ക്ക് കൈമാറി.

കൂടാതെ, മേരിക്കുട്ടിയുടെ ഭര്‍ത്താവ് മാത്യുവിനെ 2018ല്‍ കാണാതായ സംഭവത്തില്‍ വീണ്ടും അന്വേഷണം ആരംഭിക്കാനുള്ള നീക്കത്തിലാണ് പൊലീസ്.