മോജ്തബ ഖമനയി ഇറാന്റെ പുതിയ പരമോന്നത നേതാവ്; ഖമനയിക്ക് ജന്മനാട്ടില്‍ ഖബറൊരുക്കും

ടെഹ്‌റാന്‍:  കൊല്ലപ്പെട്ട ആയത്തുല്ല അലി ഖമനയിയുടെ മകന്‍ മോജ്തബ ഇറാന്റെ പുതിയ പരമോന്നത നേതാവ്. 88 അംഗങ്ങള്‍ അടങ്ങുന്ന അസംബ്ലി ഓഫ് എക്‌സ്‌പെര്‍ട്സ് ആണ് ഈ നിര്‍ണ്ണായക തീരുമാനമെടുത്തതെന്ന് ഇറാന്‍ ഇന്റര്‍നാഷണല്‍ റിപ്പോര്‍ട്ട് ചെയ്യുന്നു. 56 വയസ്സുകാരനായ മോജ്തബ, 1989 മുതല്‍ ഇറാന്റെ അധികാരാധിപതിയായിരുന്ന അലി ഖമനയിയുടെ ആറ് മക്കളില്‍ രണ്ടാമനാണ്. ഖോമിലും ടെഹ്റാനിലുമുള്ള അസംബ്ലി ഓഫ് എക്സ്പെര്‍ട്സിന്റെ കെട്ടിടങ്ങളിലേക്ക് ഇസ്രയേല്‍ ആക്രമണം നടത്തിയതായും റിപ്പോര്‍ട്ടുകള്‍ പുറത്തുവരുന്നുണ്ട്, ഇത് മേഖലയിലെ സംഘര്‍ഷാവസ്ഥ അതീവ ഗുരുതരമാക്കുന്നു.

കൊല്ലപ്പെട്ട അലി ഖമനയിയുടെ ഭൗതികദേഹം അദ്ദേഹത്തിന്റെ ജന്മസ്ഥലമായ മഷ്ഹദില്‍ ഖബറടക്കാനാണ് തീരുമാനം. സംസ്‌കാര ചടങ്ങുകളുടെ തീയതി ഇതുവരെ ഔദ്യോഗികമായി പ്രഖ്യാപിച്ചിട്ടില്ല. ഇറാന്റെ ഭരണഘടനാപരമായ സവിശേഷതകള്‍ അനുസരിച്ച്, സായുധ സേന, ജുഡീഷ്യറി, രഹസ്യാന്വേഷണ വിഭാഗം, ഔദ്യോഗിക മാധ്യമങ്ങള്‍ എന്നിവയുടെ പൂര്‍ണ്ണ നിയന്ത്രണം പരമോന്നത നേതാവിനായിരിക്കും. ഇസ്ലാമിക് വിപ്ലവത്തിന് ശേഷം അധികാരമേറ്റ ആയത്തുള്ള റൂഹുള്ള ഖൊമേനിയായിരുന്നു ആദ്യ പരമോന്നത നേതാവ്. അദ്ദേഹത്തിന്റെ പിന്‍ഗാമിയായാണ് അലി ഖമനയി അധികാരത്തിലെത്തിയത്. ഇസ്ലാമിക് റെവല്യൂഷണറി ഗാര്‍ഡ് കോര്‍പ്സ് (IRGC), ബാസിജ് അര്‍ദ്ധസൈനിക സേന എന്നിവയായിരുന്നു ഖമനയിയുടെ പ്രധാന കരുത്ത്.

മോജ്തബ ഖമേനിയുടെ അധികാരത്തിലേറലോടെ ഇറാന്റെ വിദേശനയങ്ങളില്‍ മാറ്റമുണ്ടാകുമോ എന്നാണ് ലോകം ഉറ്റുനോക്കുന്നത്. മോജ്തബയുടെ സാമ്പത്തിക ഇടപാടുകളെക്കുറിച്ച് അമേരിക്ക നേരത്തെ തന്നെ ഗുരുതരമായ ആരോപണങ്ങള്‍ ഉന്നയിച്ചിരുന്നു. എന്നിരുന്നാലും, ഈ അധികാര കൈമാറ്റത്തിന് ശേഷം ഇറാന്‍ അമേരിക്കയ്ക്ക് മുന്നില്‍ കൂടുതല്‍ വിട്ടുവീഴ്ചകള്‍ക്ക് തയ്യാറായേക്കുമെന്ന് രാഷ്ട്രീയ നിരീക്ഷകര്‍ കരുതുന്നു. ഇത് തങ്ങളുടെ താല്‍പ്പര്യങ്ങള്‍ സംരക്ഷിക്കാന്‍ സഹായിക്കുമെന്ന് ട്രംപ് ഭരണകൂടം വിശ്വസിക്കുന്നതായും സൂചനകളുണ്ട്. ഇറാന്റെ ആഭ്യന്തര രാഷ്ട്രീയത്തിലും അന്താരാഷ്ട്ര ബന്ധങ്ങളിലും വലിയ ചലനങ്ങള്‍ സൃഷ്ടിക്കുന്ന ഒന്നായിരിക്കും ഈ നേതൃമാറ്റം.