പ്രധാനമന്ത്രിയുടെ കേരള സന്ദര്‍ശനം മാറ്റി; മോദി മാര്‍ച്ച് 11ന് കേരളത്തിലെത്തും

തിരുവനന്തപുരം: പ്രധാനമന്ത്രി നരേന്ദ്ര മോദിയുടെ കേരള സന്ദര്‍ശന തീയതിയില്‍ മാറ്റം. മാര്‍ച്ച് ആറിന് നിശ്ചയിച്ചിരുന്ന സന്ദര്‍ശനം മാര്‍ച്ച് 11ലേക്കാണ് മാറ്റിയത്. എറണാകുളം കലൂര്‍ സ്റ്റേഡിയത്തില്‍ നടക്കുന്ന ചടങ്ങില്‍ എന്‍ഡിഎയുടെ തിരഞ്ഞെടുപ്പ് പ്രകടനപത്രിക പ്രധാനമന്ത്രി പ്രകാശനം ചെയ്യും. കൂടാതെ കൊച്ചി മറൈന്‍ ഡ്രൈവില്‍ നടക്കുന്ന ധീവരസഭയുടെ പരിപാടിയിലും അദ്ദേഹം പങ്കെടുക്കും. റെയില്‍വേയുടെ പുതിയ പദ്ധതികളുടെ ഉദ്ഘാടനം ഉള്‍പ്പെടെ രണ്ട് ഔദ്യോഗിക പരിപാടികള്‍ കൂടി സന്ദര്‍ശനത്തിന്റെ ഭാഗമായി ഉണ്ടാകുമെന്നാണ് സൂചന. സന്ദര്‍ശനം സംബന്ധിച്ച ഔദ്യോഗിക പ്രഖ്യാപനം ഉടന്‍ ഉണ്ടാകും.

അതേസമയം, രണ്ടുദിവസത്തെ സന്ദര്‍ശനത്തിനായി പ്രധാനമന്ത്രി ഇന്ന് തമിഴ്നാട്ടിലെത്തും. രാത്രി ഒന്‍പത് മണിയോടെ ചെന്നൈയിലെത്തുന്ന അദ്ദേഹം നാളെ രാവിലെ പുതുച്ചേരിയില്‍ 2,700 കോടി രൂപയുടെ വികസന പദ്ധതികള്‍ ഉദ്ഘാടനം ചെയ്യും. തുടര്‍ന്ന് വൈകുന്നേരം മധുരയില്‍ 4,000 കോടി രൂപയുടെ വിവിധ പദ്ധതികള്‍ രാജ്യത്തിന് സമര്‍പ്പിക്കും. സന്ദര്‍ശനത്തിനിടെ തിരുപ്പരങ്കുണ്‍ട്രം ക്ഷേത്രത്തിലും പ്രധാനമന്ത്രി ദര്‍ശനം നടത്തും. വന്‍ സുരക്ഷാ സജ്ജീകരണങ്ങളാണ് പ്രധാനമന്ത്രിയുടെ സന്ദര്‍ശനത്തോടനുബന്ധിച്ച് ചെന്നൈയിലും മധുരയിലും ഒരുക്കിയിരിക്കുന്നത്.

രാജ്യവ്യാപകമായി നടപ്പിലാക്കുന്ന ഗര്‍ഭാശയ കാന്‍സര്‍ പ്രതിരോധ വാക്‌സിന്‍ ഡ്രൈവിന് പ്രധാനമന്ത്രി നരേന്ദ്ര മോദി ഇന്ന് തുടക്കം കുറിക്കും. രാജസ്ഥാനിലെ അജ്മീറില്‍ നടക്കുന്ന ചടങ്ങിലാണ് പദ്ധതിയുടെ ഉദ്ഘാടനം നിര്‍വ്വഹിക്കുന്നത്. 14 വയസ്സ് പൂര്‍ത്തിയായ പെണ്‍കുട്ടികള്‍ക്കാണ് ആദ്യഘട്ടത്തില്‍ വാക്‌സിന്‍ നല്‍കുക. ഒറ്റ ഡോസ് ഗാര്‍ഡാസില്‍ വാക്‌സിനാണ് വിതരണം ചെയ്യുന്നത്. വിവിധ സംസ്ഥാനങ്ങളിലെ മുഖ്യമന്ത്രിമാരും ആരോഗ്യവകുപ്പ് ഉദ്യോഗസ്ഥരും ചടങ്ങില്‍ വെര്‍ച്വലായി പങ്കെടുക്കണമെന്ന് കേന്ദ്ര ആരോഗ്യ മന്ത്രാലയം നിര്‍ദ്ദേശിച്ചിട്ടുണ്ട്.