ശ്രീനിവാസന്‍ വധക്കേസ്: നാലു പ്രതികള്‍ക്ക് കൂടി ഹൈക്കോടതി ജാമ്യം

പാലക്കാട് ശ്രീനിവാസന്‍ വധക്കേസില്‍ നാലു പ്രതികള്‍ക്ക് കൂടി ഹൈക്കോടതി ജാമ്യം അനുവദിച്ചു. ജസ്റ്റിസ് രാജ വിജയരാഘവന്‍ ഉള്‍പ്പെട്ട ഡിവിഷന്‍ ബെഞ്ചാണ് ജാമ്യം അനുവദിച്ചത്. അന്‍സാര്‍, ബിലാല്‍, റിയാസ്, സഹീര്‍ എന്നിവര്‍ക്കാണ് കോടതി ജാമ്യം നല്‍കിയിരിക്കുന്നത്. ഇവര്‍ പോപ്പുലര്‍ ഫ്രണ്ട് പ്രവര്‍ത്തകരാണെന്ന് എന്‍ഐഎ കോടതിയില്‍ വാദിച്ചിരുന്നു.

പോപ്പുലര്‍ ഫ്രണ്ട് നേതാവ് സുബൈറിന്റെ കൊലപാതകത്തിന് പ്രതികാരമായാണ് ആര്‍എസ്എസ് പ്രവര്‍ത്തകനായ ശ്രീനിവാസനെ വധിച്ചതെന്ന് അന്വേഷണ ഏജന്‍സിയുടെ കണ്ടെത്തലാണ്. 2022 ഏപ്രില്‍ 16നാണ് സംഭവം നടന്നത്. ശ്രീനിവാസനെ കടയില്‍ കയറി പ്രതികള്‍ വെട്ടിക്കൊലപ്പെടുത്തുകയായിരുന്നു.

ഇതിന് മുന്‍പ് കേസിലെ ചില പ്രതികള്‍ക്ക് ഹൈക്കോടതിയും സുപ്രീംകോടതിയും ജാമ്യം അനുവദിച്ചിരുന്നു. റിമാന്‍ഡില്‍ തുടരുന്ന മറ്റ് നാലു പ്രതികള്‍ക്കും ഇപ്പോള്‍ ജാമ്യം അനുവദിച്ചതോടെ, കസ്റ്റഡിയില്‍ തുടരേണ്ട സാഹചര്യം ഇല്ലെന്ന പ്രതിഭാഗത്തിന്റെ വാദവും കോടതി അംഗീകരിച്ചു.